Жители на велешката улица „Прохор Пчински“ бараат помош за безбедно да се движат кон и околу домовите

„Десеттина технички неисправни автомобили брзо возат и закана се по нашата и безбедноста на нашите деца. Нив ги возат и малолетници. Тоа се автомобили кои не се регистрирани бидејќи им недостасуваат ветробрански или стакла на прозори а и гуми. Пред извесен период возило се спушти по удолницата на оваа улица на бандажи и остави траги на бехатон плочките,“ се жалат жители на улица „Прохор Пчински“ во Велес. Овие граѓани, исто така, информираа за веќе прегазени домашни животни од, според нив, несовесните „возачи“ на посочените автомобили.

„Имаме големи проблеми бидејќи тоа се возила кои се технички неисправини и газат кучиња, а неколку пати е избегната поголема трагедија поточно да не биде згазен човек и дете. Ќе ескалира ситуацијата а никој не сака да мрдне со прст за да се реши повеќе годишниот проблем. Ние започнавме и со собирање на потписи за во МВР да почнат со конторли на тој дел од градот,“ раскажуваат граѓаните.

Овие граѓани сметаат дека на улицата треба да се постават сообраќајни знаци и да има постојани контроли од страна на сообраќајна полиција се додека не се обезбеди нивниот мир.

Дума.мк ја прашаше Општина Велес дали се информирани за безбедноста и сообраќајните проблеми на граѓаните на оваа улица и дозволува ли законот да се постават знаци кои што ќе ја регулираат брзината на сообраќај на улицата. Оттаму одговорија:

„Технички неисправните возила, безбедноста на  возилата во сообраќајот и безбедноста на пешаците  (граѓаните) се во надлежност на МВР – СВР Велес. Кога ќе се создадат услови за реализација на основен сообраќаен проект за улица „Прохор Пчински“ и  ќе се добие согласност од МВР-СВР Велес, ќе се постави вертикална сообраќајна сигнализација.“.

За проблемите на жителите од оваа улица одговорија и од Сектор за внатрешни работи Велес  со тоа што тврдат дека сообраќајната полиција вршела редовни контроли на улицата на која имало поставени знаци за ограничување на брзината.

„Од страна на сообраќајната полиција се вршат редовни контроли на ул.„Прохор Пчински“ каде се поставени и знаци за ограничување на брзината. Во врска со возилата за кои прашувате, во Полициската станица Велес нема поднесено пријава, а доколку има сообраќајната полиција веднаш ќе постапи. Каква било нерегуларност или пак прекршок во сообраќајот граѓаните можат да пријат на телефонските броеви 112 и 192.“

Жителите на улицата „Прохор Пчински“ деновиве ќе поднесат Петиција до општината и до полицијата.

Оваа улица се наоѓа на источната страна на Велес. Станува збор за долга и многу фрекфентна сообраќајница која мине покрај црквата „Света Богородица“ и завршува на влезот на црква „Свети Спас“ во чии состав се наоѓаат и гробни парцели на голем број велешки семејства. Граѓаните при посета на вечните почивалишта на најблиските биле сведоци на застој во сообраќај поради стари и дотраени возила. Исто така, двонасочниот сообраќај по улицата е сериозен проблем поради чести застои на кои со децении надлежните градски власти само заговараа но до сега не пронајдоа решение.

Убавка Јаневска