Почина Љубчо Гигов – Гигата, велешка ракометна легенда

Во 76 година од животот,по кратко боледување, доцна вчеравечер во Велес почина Љубчо Гигов, голманот на најтрофејната машка ракометна генерација во Велес. Гигов го носеше дресот на РК„Борец“ кога во шеесетите години на минатиот век клубот го имаше најсилниот состав на ракометари со кои се натпреваруваше во Прва ракометна лига на поранешна Југославија. Повозрасните велешани, вљубеници во спортот и верни навивачи, сеуште ги паметат неговите велемајсторски одбрани додека на теренот победите се постигнуваа со успешните настапи на ракометните мајстори какви што беа Мијаков, Кирков, браќата Васкови, Атанасовски, Лазов, Димитровски и останатите. Гигов освен на велешки „Борец“ ги бранеше боите и на скопски РК„Работнички“ и екипата на РК„Овче Поле“ од Свети Николе.

По завршувањето на активната ракометна кариера,Гигов, краток временски период беше тренер на машката ракометна екипа на РК„Борец“ додека под негово долгогодишно тренерско водство најголемите успеси ги постигна женската ракометна екипа на велешки „Борец“.

Спортска легенда во последните години на активниот ангажман, со синот Виктор Гигов, исто така ракометен голман и великан со извонредна меѓународна кариера, ја создадоа ракометната школа „Гигови“.

Погребот на Љубчо Гигов ќе се изврши утре,15 декември 2022 година, во 12:30 часот, на гробиштата на црква „Свети Спас“ во Велес. Посмртните останки ќе бидат изложени во 12 часот.

Лазар Лазаровски