Во ГРК „Борец“ се вратија шест првотимци, клубот конкурентен за висок пласман

Екипата на градскиот ракометен клуб „Борец”, во недела, на 19 септември, гостува во Гевгелија каде ќе се сретне со домашниот „Партизан” во натпревар од првото коло на А -групата на првата ракометна лига.

Составот од мината сезона е изменет. Во клубот се вратија ракометарите Димче Минов, Кире Димовски, Борис Ристовски, Кристијан Ристов кои настапуваа за „Вардар“ од Неготино, Лазар Стојанов од „Тиквеш“ од Кавадарци , а на ракометот му се врати и Александар Лазаровски. Со овие играчи тимот е добро засилен и ќе биде конкурентен за висок пласман.

Душан Крстевски председателот на клубот не го крие оптимизмот.

-Имаме добар тим кој ќе се бори за пласман во плеј офот и  горниот дел на табелата. Идејата е да стасаат младите играчи и во догледно време да го вратиме ракометот во суперлигата. За таа цел во своите лиги ке настапат кадетите и младинците од кои црпиме играчи за сениорскиот тим. Ја консолидиравме финансиската состојба благодарение на спортскиот ваучер и неколку компании  од градот. Се надевам дека работите ќе одат на подобро, рече Крстевски.

Годинава ГРК „Борец” воведе и сезонски билет. Целата сезона односно повеке од 20 натпревари ќе се следат за симболични 400 денари.

Лазар Лазаровски