Петмина македонски државјани се на листата за евакуација од Газа преку преминот Рафа

Минитерството за надворешни работи потврди дека на листата за евакуација на странски државјани од Појасот Газа преку граничниот премин Рафа се наоѓаат пет државјани на Република Северна Македонија.

-Во Газа имаме вкупно пет наши државјани. Сите тие се на листата за напуштање на Газа. Исто така, покрај овие пет, на листата е една палестинска државјанка, сопруга и мајка на две деца, кои имаат македонско државјанство, наведуваат од МНР.

Вчера беше отворен преминот Рафа на границата меѓу Египет и Појасот Газа, а на видео снимките се гледа како луѓе и автомобили го напуштаат Појасот Газа, објави „Гардијан“. Амбулантни возила чекаа на египетската страна на преминот Рафа за да ги пренесат повредените Палестинци.

Тие беа и првите Палестинци на кои им беше дозволено да го напуштат Појасот Газа од почетокот на конфликтот меѓу Хамас и Израел на 7 октомври. Некои медиуми објавија дека Египет гради теренска болница долж границата со Појасот Газа.

Египет, Израел и Хамас, со посредство на Катар и во координација со САД, постигнаа договор да им се дозволи на странските државјани и на некои сериозно повредени цивили од Газа да ја напуштат областа. Не е прецизирано колку време ќе биде отворен преминот Рафа.

Пограничните власти на Газа, утрово, објавија листа со 596 странски државјани и лица со двојно државјанство од 15 земји на кои им е дозволено денеска да ја напуштат Газа, меѓу нив се и неколкумина македонски државјани.

Дума.мк