Поповски: Доаѓаат врнежи, грмежи и невреме!

Поради продор на поладен воздух од север на висина над регионов, како дел од Европа, ќе дојде до поголема дестабилизација на атмосферата во Македонија.

„Денес, вторник, 15 јули, во пладневните и во попладневните часови на повеќе места ќе има развој на грмотевични конвективни облачни јадра од кои очекувам појава на пороен дожд, грмежи и засилен ветер. Локално пак атмосферските процеси ќе бидат поинтензивни и во форма на невреме, проследено со обилен пороен дожд за кратко време, силен ветер, електрични празнења  и со услови за појава на град.

И во делови од Скопскиот регион очекувам појава на нестабилност, проследена со пороен дожд, грмежи и засилен ветер, а во делови од котлината можна е појава и на краткотрајно невреме.

Токму поради ова, апелирам граѓаните да обратат поголема внимателност, односно, во случај на појава на електрични празнења да не се претстојува на отворен простор  и под осамени дрвја. Исто така, во случај на појава на силен ветер, препорачувам граѓаните да ги заштитат своите автомобили , односно да не ги ставаат во близина на дрвјата, особено под осамени.

Што се однесува до температурите, тие ќе се искачуваат во интервалот од 29 до 37 степени, а во Скопје и околината максималната температура ќе се искачи до околу 35 степени.

На следниот линк можете да ја следите алатката за рано предупредување од невреме НОТАС, и истата е од голема корист на секој граѓанин https://nothas.finki.ukim.mk/,“ соопшти метео прогнозерот Славчо Поповски.