Коки: „Постојат политичари кои катадневно работат против безбедноста на државата, ама живеат удобно и безбедно,со безбедносен сертификат“

Добар ден, денешен и наредни како и убава работна недела ви посакувам мои велешани како и останати читатели на Дума.мк коишто преку читање на афоризмите ја разбивате монотонијата на секојдневието кое воопшто не е едноставно за ниту еден од нас. За сите вас минатата недела ги напишав овие, денеска, објавени афоризми:  

-Во работата треба да се биде внимателен на почетокот, а во љубовта…на крајот.

-Постојат политичари кои катадневно работат против безбедноста на државата, ама…живеат удобно и безбедно, со безбедносен сертификат.

-На политичарите не треба да им се верува ниту тогаш, кога  лажат!

-Несфатливо е како мојата соседка се зазема за зачувување на човековата животна средина, кога не е во состојба да си ја зачува ниту својата…

-Патиштата не ни се толку тесни, колку што на возачите им недостига широчина.

-Многу луѓе обрнуваат поголемо внимание на движењето на курсот на девизите, отколку на движењето на своите сопруги.

-За искусните и вешти „ловџии” на женски срца, не постои определена сезона за лов.

Вашиот КОКИ