Оставката на Заев е лоша за цел регион, не само за Македонија
Оставката на премиерот Зоран Заев е лоша не само за Северна Македонија, туку и за целиот регион, посочуваат српски аналитичари за Блиц. Според нив, повлекувањето на Заев би влијаело на разговорите за „Отворен Балкан“.
-Иако на прв поглед се чини дека оставката на Заев е политички добредојдена бидејќи на овие простори оставки не се поднесуваат и по изгубени војни, сепак мислам дека оставката е многукратно полоша за Северна Македонија и за македонското општество, како и за целиот регион. Заев е човек кој успеа да го реши деценискиот конфликт меѓу Скопје и Атина, да ја отвори вратата за полноправно членство во НАТО, да развие добрососедски односи во регионот и конечно да биде стабилен партнер на исклучително вредниот Отворен Балкан (Мал Шенген) проект, вели за Блиц Драган Шутановац.
За жал, поради односот со Бугарија, но и поради индолентниот однос на ЕУ кон „македонското“ прашање, неговата влада, додава Шутановац, доживеа повеќе нокдауни пред конечно да биде нокаутирана.
-Целосното неразбирање на струите на Западен Балкан, справување со самиот себе, влечење проблеми наместо барање решенија за влез на Северна Македонија во ЕУ, со тоа Заев почна да се бори како Дон Кихот. Лично сум убеден дека Заев оваа одлука ја донел поради револтот, но познавајќи ги интересите мислам дека е многу можно тоа да не биде крај на неговата кариера, истакнува Шутановац.
На сето ова се надоврза и Сузана Грубјешиќ од Центарот за надворешна политика.
-Македонската влада и граѓаните испија неколку горчливи апчиња поради ветувањето за европска иднина, како промена на името, Уставот, значајни отстапки за Албанците, за да останат во чекалната на ЕУ, со бугарско вето од причини кои тешко се објаснуваат во 21-ви век. Тоа е лоша порака за сите останати во регионот бидејќи се покажува дека реформите и посветеноста не се доволни ниту за почеток на преговорите со ЕУ. Овој изборен резултат е директна последица на неисполнетите европски ветувања, истакнува Грубјешиќ за Блиц.
Марко Савковиќ, извршен директор на белградскиот Фонд за политичка извонредност, исто така вели дека оставката на Заев може да има последици за регионот.
-Ова покажува колку е кревка поддршката на која сметаат реформистите. Ова не е показна вежба на ЕУ, бидејќи не е виновна самата ЕУ што нема отворање на преговорите, туку виновни се конкретни членки на ЕУ. Мора да престанеме со практиката да ја обвинуваме ЕУ. Нејзините тела, Комисијата и Парламентот дадоа позитивно мислење и повикаа на отворање на преговорите, неколку пати, вели Савковиќ.
Што се однесува до „Отворен Балкан“, Савковиќ верува дека соработката со новата влада, кој сепак треба да ја води СДС, ќе продолжи.
-Лошо е поради тајмингот на најавениот собир во Белград, тоа е точно, но ќе видиме дали Северна Македонија сепак ќе биде претставена на некое ниво, вели Савковиќ.
