Ковачевски: Сите сојузници на НАТО се обединети, ќе ја понудиме нашата поддршка за народот на Украина

Денес сите сојузници на НАТО се обединети и ќе ја понудиме нашата поддршка за народот на Украина, изјави премиерот Димитар Ковачевски од Брисел.

– Ќе останеме обединети и Северна Македонија како земја членка на НАТО веќе ја усогласи својата надворешна политика со Европската Унија и ги донесовме сите одлуки усогласени со земјите членки на НАТО и на ЕУ со цел да го одвратиме она што путинова Русија го прави во Украина а во насока да им помогнеме на украинците. Исто така ги донесовме сите потребни одлуки во земјата за да ги прифатиме сите бегалци кои што би побарале засолниште во нашата држава, рече Ковачевски пред почетокот на вонредниот НАТО cамит на шефови на држави и влади.

На дневен ред на шефовите на држави и влади во НАТО денеска ќе се разговара зајакнувањето на источниот дел на Алијансата. Како што најави генералниот секретар Јенс Столтенберг вчера, се очекува денеска да се донесе одлука за испраќање дополнителни борбени трупи во четири источноевропски земји.

Се очекуваат и разговори за дополнително зголемување на буџетот за одбрана на земјите членки на НАТО, кои истовремено се соочуваат со драстичен раст на цените на енергијата и секојдневните основни производи.