Домот на култура “Иван Мазов – Климе“ Кавадарци до новогодишните празници со богата програма за публиката од сите возрасти

Програмата започнува во вторник, 12 декември 2023, во 19:00 часот со отворање ликовна изложба насловена како “поема за атомите“ на Благојче Петровски од Битола. Два дена подоцна, во четврток, на 14 декември 2023, со почеток во 20:00 часот Театарот при Домот на културата “Иван Мазов – Климе“ Кавадарци премиерно ќе ја одигра претставата “Каша и кубаси“ во режија на Диме Коцевски. Претставата репризно ќе се прикаже наредниот ден со исто време на почеток. Во првиот ден од викендот, сабота, на 16 декември 2023, со почеток во 20:00 часот, на сцената на кавадаречкиот Дом на култура гостува гостиварски театар со претстава “Чорба од канаринец“.

Во среда, на 20 декември 2023, со почеток во 19:00 часот Театарот при кавадаречкиот Дом на култура премиерно ќе ја одигра новогодишната детска претстава “Снежно патување“ работена според авторски текст и режија на Александар Малинков. Потоа претставата ќе биде прикажана во десет дневни термини за сите ученици од нижите одделенија на кавадаречките основни училишта.  

Во четврток, на 21 декември 2023, со почеток во 19:00 часот е закажан почетокот на отворањето на Изложба на народни носии. Во сабота, на 23 декември 2023, со почеток во 18:20 часот, Годишeн концерт ќе одржи Фолклорниот ансамбл „Тиквеш“, којшто работи при домот.

На 28 декември, четврток, со почеток во 19:00 часот, ќе биде отворена Годишна изложба на Друштвото на ликовни уметници Кавадарци (ДЛУК) и со почеток во 20:30 часот, ќе започне репризното прикажување на претставата „Каша и кубаси“.

Кавадаречкиот Дом на култура ги поканува граѓаните да ја проследат годинешната новогодишна програма.

Убавка Јаневска