Во велешката библиотека се одржа литературно читање на тема „Младите во светот на поезијата“ (фото)

Литературно читање на коешто учество земаа осум ученици од Велес, се одржа денеска, во медијатеката на велешката библиотека. Темата на поезиите беше „Младите во светот на поезијата“ и настанот се одржа по повод 21 март, Светскиот ден на поезијата.

Организаторот на настанот е ученичката Стефанија Јакимовска од СОУ „Гимназија – Кочо Рацин“, којашто воедно е и активен волонтер во Младински центар Велес како и претседателка на Локален младински совет на Општина Велес. Јакимовска пресреќна им се заблагодари на сите присутни што одвоиле од своето време и дошле да го проследат овој убав културен настан.

-Како љубител на поезијата од најмала возраст одлучив, денеска, да организирам литературно читање на коешто учество ќе земат ученици од повеќе училишта. Овој настан воедно е и дел од мојата проектна задача како задолжителен дел од  државната матура под менторство на професорката по македонски јазик и литература Магдалена Сарагинова, додаде Јакимовска.

Со свои поезии се претставија учениците Андреј Димовски, Стефани Стојчева, Ана Тодорова, Ангела Димитрова, Изабела Ѓурчиновска, Василка Карталова, Михаела Перкова и Георгина Димовска.

Исто така, настанот беше збогатен и со две музички точки отсвирени од учениците Михаил Петковски, Стојан Димовски и Ангел Богоевски.

Стефани Манева