Во вакцините против ковид-19 нема „зачудувачки нечистотии“

Вакцините против ковид-19 не содржат никакви нечистотии, како што се тврди во постот што е предмет на нашата анализа. Во вакцините против ковид-19 нема никакви објекти, ниту живи организми, ваквите тврдења не се научно поткрепени, ниту пак, се докажани. Текстот што се споделува во постот е преземен од веб сајт што шири антиваксерски теории на заговор и дезинформации, познат по промовирање на алтернативна медицина, псевдонаука и десничарски екстремизам

Пост на Фејсбук пласира вест околу составот на вакцините против ковид-19 што не соодветствува со фактите. Според постот, вакцините содржат „зачудувачи нечистотии“. Ваквите тврдења не се научно поткрепени. „Вистиномер“ досега ги има дебанкирано вестите дека вакцините против ковид-19 содржат микрочипови и живи организми.

Написот во постот се повикува на истражување на група германски лекари и истражувачи патолози, кои тврдат дека во крвта на вакцинираните лица против ковид-19, како и во самите вакцини, пронашле нечистотии.

Како што е соопштено од Фондацијата RAIR, патолозите ја претставиле анализата заедно со видео и фотографии од вакцината за време на шокантна, но малку објавена прес-конференција во септември. Најпрво во вакцините се откриени туѓи предмети. „Некои од страните предмети се опишани како „прецизно конструирани“, а исто така – шокантно – црви што излегле од јајцата“, се вели во извештајот на фондацијата, пишува во написот.

На почетокот вреди да се спомене дека текстот е преземен од портал, кој, според Википедија, шири антиваксерски теории на заговор и лажни вести, познат по промовирање на алтернативна медицина, псевдонаука и екстремно десничарски екстремизам.

Во написот се вели дека „шокантната анализа“ ја претставиле патолозите од фондацијата РАИР. Доколку отидете на веб-страницата на оваа фондација, во описот за неа, ќе го прочитате следното:

RAIR Foundation USA (Rise Align Ignite Reclaim) е „грас рут“ активистичка организација составена од  Американци кои го предводат движењето за враќање на нашата Република од мрежата на поединци и организации кои војуваат против Американците, нашиот Устав, нашите граници и нашите јудео-христијански вредности. RAIR е интегрирана медиумска платформа која ги засилува гласовите на тивкото мнозинство, истовремено информирајќи ги граѓаните за секојдневните напади врз слободата и поттикнувајќи ги лидерите и „грас рут“ активистите со цел да се бори против заканите од исламските врховисти, радикалните левичари и нивните сојузници. Користење на стратегијата „Четири столбови“ на RAIR за образование, заедница, акција и коалиција; Пристапот на RAIR базиран на „грас рут“ им дава моќ на граѓаните да ги неутрализираат овие напади врз нивните заедници. Пристапот од долу нагоре на RAIR за неутрализирање на нападите врз нашите слободи има потенцијал да ја префрли моќта назад на граѓаните. RAIR ќе ги документира активностите на клучните субверзивни играчи кои моментално уживаат малку контрола во актуелниот медиумски пејзаж, изложувајќи ги нивните активности и креирајќи стратегии за да им се спротивстават. RAIR ќе ослободи невиден граѓански активизам и ќе негува водачи на заедницата, пополнувајќи ја празнината во движењето за слобода.

Во описот на страницата никаде не пишува дека РАИР е научна организација или здружение. Од вестите објавени на оваа веб-страница може лесно да се забележи дека истата промовира „херои“ кои се против вакцините, односно антиваксери и кои се противат на носењето маски и на сè што е поврзано со колективните мерки за заштита од коронавирусот. На пример, оваа веб-страница ја промовира и добро познатата теорија на заговор дека вакцините против ковид-19 ве прават магнетни.

НАУЧНО НЕОСНОВАНИ ТВРДЕЊА

Понатаму во написот линкуван во постот се посочува дека презентацијата ја воделе д-р Арне Буркхарт и д-р Валтер Ланг.

Презентацијата ја воделе д-р Arne Burkhardt, кој 18 години бил „Раководител на Институтот за патологија во Reutlingen, а потоа работел како патолог во приватна пракса“, како и д-р Walter Lang, кој работел како патолог на Медицинскиот факултет во Hannover од 1968 до 1985 година, пред да основа приватен патолошки институт во Hannover, и д-р Werner Birkholz, поранешен професор по електротехника кој се фокусирал на управување со ризик и квалитет на Универзитетот Jacobs во Bremen.

„Вистиномер“  веќе има пишувано за „шокантната презентација“ на овие доктори во врска со составот на вакцините против ковид-19, кои тврдеа дека извршиле обдукции кај починати вакцинирани лица и дека во нивната крв биле пронајдени објекти кои личеле на микрочипови.

Ваквите изјави на д-р Буркхарт и д-р Ланг беа отрфлени како научно неосновани од страна на професионалните здруженија за патологија кои се дистанцираа од изјавите и наводите на пензионираните патолози. Според нив, наводите на Буркхарт и Ланг биле погрешно протолкувани, а нејасно е од каде потекнуваат органите чијашто обдукција наводно била направена и истата била презентирана. Нема цврсти докази дека во вакцините биле пронајдени метални предмети како чипови.

Професионалните здруженија се дистанцираат од изјавите и ја доведуваат во прашање нивната научна природа. Некои од прикажаните резултати се толкувани погрешно, а методите на истражување се нејасни. Исто така, нема докази за контаминација на вакцините против ковид-19 што се користат во Германија со метални супстанции, наведува Коректив.орг.

Федералното здружение на германски патолози (БДП) и германското друштво за патологија (ДГП) во изјава за Коректив.орг, исказите и податоците на патолозите Буркхарт и Ланг дека луѓето на кои им направиле обдукција починале од вакцини кои содржеле метали, ги опишале како научно неосновани.

Тимот на „Германскиот регистар за аутопсија на ковид-19“ (DeRegCOVID), кој бил формиран за време на пандемијата во Универзитетската болница Ахен за да создаде централен регистар за обдукции на починати од ковид-19, исто така, во изјава за Коректив.орг посочил дека дека податоците презентирани на конференцијата не можат да се користат како би се поврзале смртните случи со вакцините.

ВАКЦИНАЛНАТА ДОЗА Е ПРЕМНОГУ МАЛА ЗА МИКРОЧИП

„Вистиномер“ веќе има пишувано и за тоа дека вакцините против ковид-19 не содржат никакви чипови.

Првиот доказ за ова е дозата на вакцината. Таа е помала од еден милилитар! Стандардната доза на „Фајзер“ содржи 0.3 милилитри. Тоа не е доволен волумен во кој би можел да се вметне микрочип, дури и кога некој би посакал да направи такво нешто. Ова го потврдиле и проверувачи на факти од Австралија кои се занимавале со ова прашање.

Интерната димензија на иглата е 0.3 милимери. Чипот би морал да е фракција од ова, за да се спречи да се заглави. Мислам дека не е можно, а особено зашто би морало да биде вграден и трансмитер. За микрочипот да може да помине низ оваа игла со која се врши вакцинацијата, би морал да биде помал од десет илјадинки од милиметар, пишуваат проверувачи на факти од Австралија.

Експертите велат дека не постои никаква можност во содржината на вакцината да се вметне технолошки материјал.

ВО ВАКЦИНИТЕ НЕМА ПАРАЗИТИ И ПОЛИПИ

Понатаму, написот што се споделува на Фејсбук се повикува и на тврдењата на д-р Кери Мадеј дека во вакцината против ковид-19 има живи организми. „Вистиномер“ го има дебанкирано и ова тврдење.

Д-р Carrie Madej, интернист, открила страни објекти откако ја проучувала содржината на „инјекциите“, вклучувајќи објекти слични на графен и „нешто што наликува на пипала во вакцината на Модерна“, се вели во написот.

И ова не е точно. Во вакцините против ковид-19 нема живи паразити и полипи.

Џером Мартин, коосновач на Опсерваторијата за транспарентност на политиките за лекови (l’Observatoire de la transparence dans les politiques du medicament), во изјава за „Обсерверс Франс 24“ вели дека би било невозможно паразити или кое било друго живо суштество, да постојат во вакцината против ковид-19.

Водата и другите течности во вакцината се прочистуваат под строги услови, што спречува какви било паразити или други живи организми во вакцината, изјавил Мартин за тимот „Обсерверс Франс 24“.

Од компанијата „Џонсон и Џонсон“ во изјава за „Ројтерс“, тврдењата на Мадеј ги оцениле како дезинформации. Од компанијата посочуваат дека сите состојки на нејзината вакцина против ковид-19 се јавно достапни преку Националниот институт за здравје (NIH).

Заедно со неактивните состојки, вакцината против ковид-19 Џонсон и Џонсон ја содржи активната состојка Ad26.COV2.S, вирусен генетски материјал кој не може да се копира сам, изјавиле од компанијата за Ројтерс.

Од „Фајзер“, исто така, во изјава за „Ројтерс“ потврдуваат дека нивната вакцина против ковид-19 не содржи никакви вирусни честички или живи компоненти. Станува збор за синтетичка мРНА вакцина од која целосниот список на состојки може да се најде на веб-страницата на Управата за храна и лекови (ФДА) на САД.

Состојките на вакцините кои се достапни во Северна Македонија, исто така, се јавно објавени и можат да се најдат на веб-страницата „ковид19вакцинација.мк“.

Од сето погоре можеме да заклучиме дека вакцините против ковид-19 не содржат никакви нечистотии како што се тврди во постот што е предмет на нашата анализа. Во вакцините против ковид-19 нема никакви објекти ниту живи организми. Ваквите тврдења не се научно поткрепени, ниту пак, се докажани. Поради тоа, постот го оценуваме како невистинит.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар