Акцијаши од Велес и Скопје го исчистија дворот на црква „Свети Никола“ во село Рудник, теренот ќе се подготвува за пошумување

Осум скопски и велешки акцијаши ветерани денеска волонтерски работеа на расчистување на дворот на една од најстарите велешки цркви „Свети Никола“ во село Рудник. За шест часа доброволна работа ископани беа сите гранки од диви дрвја, грмушки, жбунови и коров.

Внимателно, собраниот материјал од акцијата беше собран во купови и заапален а потоа остатоците од горењето изнесени од дворот.

-Ова е прва од двете планирани доброволни акции. По расчистувањето на теренот сега таму ќе може да дојде липкер и да ја изора земјата, за да се ископаат дупи во кои ќе можат да се засадат дрвја. Садењето на дрвцата ќе го реализираме во втора доброволна работна акција со поголем број на акцијаши ветерани на двете граѓански здруженија, скопското и велешкото, рече Делчо Костов претседател на ЗГ „Велешки Акцијаши“.

Како што соопштија акцијашите, црквата наскоро ќе се реновира и реставрира со донација.

Убавка Јаневска