Форум во Чашка: „Одлучи сам за твојата околина, својата општина“

Со цел за вклучување на граѓаните во процесот на одлучување, создавање и јакнење на капацитети на сите вклучени страни, подобрување на соработката, вмрежување и создавање на партнерства на локално ниво и подобрување на животот на граѓаните во заедницата, Локална самоуправа на Чашка во соработка со УНДП и Швајцарската агенција за развој и соработка, ја одржа втората од вкупно петте форумски сесии на кои присутните граѓани ги лоцираат проблемите во локалната средина што се однесуваат на социјална инклузија.

На втората форумска сесија беа понудени решенија преку презентација на концепти како што се „Реконструкција на куќа, куќи за лица со посебни потреби и за мали групни домови“, „Културен рекеративен центар“, „Изградба и реконструкција на спортски игралишта во населба Чашка,село Долно Јаболчиште и село Горно Јаболчиште“, „Информатички кабинети„ и „Заштитна ограда за безбедност на река Тополка, Горно Јаболчиште“. Овие концепти на следната форумска сесија, што ќе се одржи на крај на месец април 2020 година, ќе бидат презентирани и развиени во образец за проекти. 

Најмалку еден, а најмногу три проекти ќе бидат поддржани од проектниот фонд со кој располага форумот поточно 50.000 швајцарски франци преку проектот „Зајакнување на општинските совети“.
Главна тема на интервенција на форумот е Социјална инклузија, вклучувајќи и поврзани теми со родова еднаквост, добро владеење и социјална инклузија и меѓуетничка соработка.

На досега одржаните две форумски сесии активно учество земаа претставници на јавните установи, основните училишта, здруженија на граѓани, месни заедници , жители од населените места Населба Чашка, Горно Врановци, Долно Јаболчиште, Горно Јаболчиште , Богомила и Стари Град.

Локалната самоуправа на Чашка упати апел за искористување на можноста од страна на граѓаните во општината за нивно вклучување во форумските сесии./У.Ј