Во Нежилово, откриена спомен плоча на првоборецот Невена Георгиева Дуња

Ликот на младата македонска хероина стои на спомен плочата поставена во комплексот на рибникот, на самиот влез во селото Нежилово. На овој начин жителите на селото и оддадоа должна почит и благодарност за придонесот за зачувување на идентитетот на македонскиот народ.

Спомен обележјето е поставено во близина на местото на загинувањето на најмладата партизанка на Првиот скопски партизански одред и на велешкиот партизански одред „Димитар Влахов“, припадничка на младинското, синдикално и работничко движење меѓу двете светски војни и учесник во Народноослободителната војна од 1941 година.

Во присуство на нејзиниот брат Љубиша Георгиев со семејството, спомен плочата, беше откриена по 89 години од смртта и на денот кога Невена Георгиева Дуња била родена.

– Името на училиштето во кое учев, овде во Нежилово, го носеше името на оваа македонска хероина. Таа загинала во местото викано Рамноборје, под изворите на Бабуна и на само четири километри од селово. Мојата баба ми го раскажуваше настанот кога откако ја убиле бугарската полиција и контра-четниците, на Невена и  ја отсекле главата и ја фрлиле на сред село. Тие потоа за да го заплашуваат населението во АЗОТ, главата ја набиле на кол и ја шетале од овде до Велес. Ние, жителите на селото одлучивме да и се оддолжиме за нејзината храброст и за придонесот за зачувување на идентитетот на македонскиот народ. Затоа ја поставивме оваа спомен плоча, рече Трајче Димовски.