Во полн ек е бербата на бостан во демиркапијско!

Земјоделците од населените места на општина Демир Капија од секогаш се занимаваат со одгледување на бостан на поголеми површини. За разлика од лани,годинава земјоделците од селата  Прждево, Бистренци и  од Корешница ги зголемија површините со оваа градинарска култура со цел да заработат  пари за исхрана и наплата на давачките.

„Бербата на лубениците и на дињите ја започнавме пред десетина  дена. Дневно се бере по околу еден тон бостан кој сме пренудени со запрежни коли и со тракторски приколки да  го продаваме  по улиците на Демир Капија. Моменталната цена е десет денари за килограм“ објаснуваат бостанџиите.

Тие се задоволни годинава од квалитетот но и од цената по која го продаваат родот.  Бербата и пласманот на оваа градинарска култура ќе трае се до средината на идниот месец.