Kонцерт на Стојческа, Богоромова Краповски, Краповски и Ромен Петиот од „Алтуз НЗ“ ансамбл се одржа во велешки Театар

Љубителите на класичната музика во Велес, вчера вечер, имаа ексклузивна можност да присуствуваат на концерт којшто го изведоа членовите на ансамбл „Алтус НЗ“ и на кој што изведоа програма составена од дела на македонските композитори Дарија Андовска, Дамјан Темков, Бојан Димитровски, на францускиот композитор Алберт Русел и латино-американските композитори Астор Пјацола, Мануел Мариа Понс и Хеитор Вила Лобос.

„Алтус НЗ“ ансамбл го сочинуваат сопран Гонца Богоромова-Краповски, флејтистката  Елена Стојческа, виолончелистот Паскал Краповски и францускиот гитарист Ромен Петио. Станува збор за веќе реномирани музички имиња чии музицирања се познати на македонската но и на сцените на реномирани фестивали во Европа и пошироко.

Алтус НЗ ансамбл (Altus NB) е проект кој е од особено значење за македонската култура како ансамбл кој во континуитет ја одржува потребата за изведба и создавање, а со тоа афирмација и зачувување на македонското современо музичко творештво. Ансаблот се формираше од потртебата за наследник на работата на претходните ансамбли – „Алеа“ и „КонТемпора“, а со тоа, членовите на „Алтус НЗ“ го следат патот поплочен од ансаблот „Св.Софија“ поточно првиот македонски  ансабл за современа музика.

Со своето основање во 2021 година, овој македонско – француски состав, постави и платформа за меѓународна соработка помеѓу исклучителни уметници – љубители на современата музика и со  едноставна премиса „да се понуди висок изведувачки квалитет, мобилност и флексибилност  на концертниот подиум, како и вмрежување на изведувачи, композитори, универзитети и институции за култура и образование“.

И покрај тоа што е релативно нов протагонист на современата музичка сцена, ансамблот веќе вбројува настапи на домашни  и  меѓународни подиуми, со учество на фестивалите Охридско лето, Денови на македонска музика, Скопско и Штипско културно лето, Les Musicales de Quiberon во Франција, Dynamik Fest во Салзбург и Kosovo Composers Festival во Приштина.

Убавка Јаневска