Лишен од слобода полициски службеник од Неготино и уште двајца ловџии за криволовство како и за откриена марихуана
Објавено: 23 јануари, 2026, во 13:30 часот
Полициски службеници од Полициската станица за граничен надзор Михајлово при Регионален центар за Гранични работи Југ, во понеделникот на 19 јануари, ги лишиле од слобода М.З.(31), полициски службеник од Неготино, К.Т.(29) и Б.П.(28), двајцата од с.Тимјаник, неготинско.
„ При вршење службени дејствија во атар на село Копришница, демиркаписко, на место каде што нема концесија за лов, односно забранет е лов, полициските службеници ги забележале лицата како излегуваат од патничко возило „лада нива“ со ловечка пушка, а откако се оддалечиле од возилото слушнале повеќе истрели од огнено оружје. Откако се вратиле, лицата се лишени и задржани во полициска станица, при што од М.З. е одземена ловечка пушка „Хуглу“ со патрони. Исто така, полициски службеници од ОВР Неготино, со судска наредба, извршиле претрес во викенд куќа што ја користел К.Т. во атар на с.Копришница, каде биле пронајдени и одземени ловечки патрони, марихуана, дробилка и останати предмети. Известен е јавен обвинител и по целосно документирање на настанот ќе биде поднесена соодветна пријава,“ соопштија од Сектор за внатрешни работи Велес.
Убавка Јаневска
