Осуммината велешани, затечени од состојбата во Израел, ноќеска се вратија дома

Со авион од Тел Авив до Тирана бил организирано враќањето на осуммината велешани кои беа соочени со насилните дејствија во Израел. Според изјава на еден од нив за Дума.мк тие прво помош побарале од македонската Амбасада а потоа се јавувале и кај пријатели.

„Амбасадорот во Израел прво ни помогна во обидот што поскоро да се вратиме во Македонија. Беше договорено тоа да го направиме со лет на авиокомпанија која пренесуваше граѓани на Албанија. Така дојдовме во Тирана. Таму не пречека македонскиот Амбасадор, Данчо Марковски и одвои време за нас. Разговаравме додека го чекавме превозот од Македонија и бидејќи недостасуваше едно место,Марковски, ни го даде личното возило за да стигнеме дома. Во Израел бевме туристички. Бомбардирањето не затекна во хотел. Тамошното население воопшто не беше вознемирено но ние се вознемиривме. Добро сме сите и сега сме дома, рече велешанец кој побара да остане анонимен.

Исто така, Министерството за надворешни работи информира дека вчера 20 македонски државјани го напуштиле Израел, а бројката на пријавени кои сакаат да заминат надмина 100 лица. Поголемиот дел од овие граѓани се наоѓаат на локации кои се сметаат за безбедни, а околу дваесетмина од нив, веќе имаат обезбедено билети за некои од комерцијалните редовни или чартер летови кои се на располагање.

Според Министерството, неколку граѓани, во рамките на нашите контакт точки се пријавиле дека се наоѓаат во деловите на земјата кои беа опфатени со насилните дејствија и се сметаат за небезбедни. Македонската амбасада во Тел Авив, како и контакт центарот во Скопје е во постојан контакт со нив и активно се работи за да се обезбеди нивен трансфер на безбедна локација, од каде би можеле да бидат упатени кон дома.

МНР уште еднаш ги повикува македонските граѓани кои во моментов се наоѓаат во Израел да ги почитуваат упатствата на безбедносните власти на Израел, како и да се пријават во амбасадата во Тел Авив или на дежурните телефони во централата во Скопје.

„Безбедносната состојба во Израел сѐ уште останува сложена. Состојбата во и околу Тел Авив, како и поголемите градови во Израел и делот на Западниот брег иако без воени операции останува напната. Меѓународниот аеродром во Тел Авив е во целосна функција и од таму сѐ уште оперираат редовните комерцијални летови, како и посебните чартер летови, но бројни авио компании низ светот во најголем дел ги одложија редовните линии со што редовниот авио превоз е отежнат“, соопшти МНР.

Министерството за надворешни работи изготвило детална анализа и проекција на сите можности кои ќе ги презентира пред Владата, која потоа ќе одлучува за натамошните чекори кои ќе бидат преземени.

Проценките на кризниот штаб се дека на територијата на Израел и загрозените подрачја се проценува дека престојуваат меѓу 100 и 200 наши државјани, од кои преку половината се прецизно мапирани и редовно се одржува контакт со нив.

За повеќе информации, МНР ги објавува СОС дежурните телефони на Министерството за надворешни работи 075/ 273- 732 и 075/268-736, како и дежурниот телефон на Амбасадата во Тел Авив +972-54-926-7378

Подетални информации околу актуелните состојби можат да се најдат на следната веб страница: https://www.oref.org.il/12481-en/Pakar.aspx

Убавка Јаневска