Светиниколци проследија презентација на воена опрема од вежбата „Одлучен удар 19“

Граѓаните на Свети Николе денеска имаа ретка можност да видат возила, вооружување и опрема која се употребува на заедничката воена вежба „Одлучен удар 19″ во која учествуваат околу 2.700 војници на АРМ и армиите на САД, Литванија, Албанија, Бугарија и Црна Гора.

Презентацијата на воени возила, вооружување и опрема се одржа на градскиот стадион во Свети Николе, попладнево со почеток во 18:00 часот. Светиниколци имаа можност преку директна комуникација поблиску да се запознаат со опремата, постапките и процедурите кои ги извршуваат припадниците на армиите учеснички на оваа досега најголема воена вежба во државата.

По презентацијата се одржа и фудбалски натпревар помеѓу екипа на Општина Свети Николе и екипа од припадниците на армиите кои учествуваат на вежбата. За време на настанот над стадионот беше реализиран прелет од армиски хеликоптери МИ-18 и УХ-60.

Вежбата „Одличен удар 19“ над еден месец ќе се изведува на армискиот полигон „Криволак” со цел зајакнување на стандардните оперативни процедури на единиците од составот на армијата, подобрување на интероперабилноста и унапредување на заемното разбирање и доверба и зајакнување на меѓусебната соработка./У.Ј