Жители на три велешки села, во пресрет на Рамазан Бајрам, вчера останаа а преку интервенција на ЦУК денеска добија струја

Без електрична енергија од вчера останале жителите на велешките села Бузалково, Сливник и Клуковец. Во изминатите 24 часа, само рано утринава, помеѓу 03:00 и 04:00 часот, светнале светилките како во домовите така и на улиците во село Бузалково. Жители на селото со огромен револт се јавуваа и раскажаа како сосема биле блокирани нивните подготовки за одбележувањето на празникот Рамазан Бајрам. Сите бараа помош за повторно да добијат струја.

-Не можеме да ја одржуваме личната хигиена. Жените целосно ги запреа подготовките на храна за одбележување на празникот Рамазан Бајрам. Не можеме ниту семејната прослава да ја организираме а не да помислиме да одиме на гости. Можете ли да прашате што се случува со дефектот кој од вчера околу пладне се појави и секако да ни помогнете да добиеме струја, велеа на телефон жители на село Бузалково.

Дума.мк од нивните искажувања дозна дека не само ова село со околу 2000 жители туку без струја биле и селата Сливник со околу 650 и Клуковец со близу 500 жители.

На испратените новинарски прашања за причините коишто од вчера ги оставиле без електрична енергија овие граѓани на Општина Велес одговори Центар за управување на кризи.

-Од ЕВН Македонија известија дека утрово бил пријавен дефект на нисконапонската мрежа во село Бузалково и екипа на ЕВН Македонија го отстранила дефектот. Екипата во моментот интервенира на други дефекти во Велес. Пријавен е повторно дефект на нисконапонската мрежа и веднаш после отстранувањето на дефектот во градот Велес ќе интервенираат на дефектор во село Бузалково. Екипите на ЕВН Македонија интервенираат на дефектите по време на пријава од страна на граѓаните, соопшти Стојанче Ангелов директор на Центар за управување со кризи.

Жителите на село Бузалково по еден час се јавија и соопштија дека имаат електрична енергија како и дека биле сведоци на доаѓањето на екипата на ЕВН која интервенирала во трафостаницата. Тие тврдеа дека само по неколку минути електична енергија добиле сите домаќинства, во трите села, за коишто според нив истата трафостаница била главна за напојување со нисконапонска струја. Сепак кај дел од нив остана сомнежот зошто мораа да останат без електрична енергија пред одбележување на големиот муслимански празник.

Убавка Јаневска