Гимназијалците покажаа интерес за карате стилот Уечи Рју Окинава

На часовите по физичко воспитување гимназијалците, неделава, имаа гости од карате клубот Уечи Рју – Окинава во Велес. Тие им ги презентираа вештините со цел средношколците да ги видат предностите и одблизу да се запознаат со се што лично ги интересира за овој карате стил. Учениците како и професорите во ова средно училиште во градот покажаа голем интерес што ги поттикна каратистите да испланираат и наредна средба.

– Сите ученици и професори беа со нас и морам да кажам дека сум особено задоволен од интересот. Тоа ме изненади но и ме поттикна да предложам наредна средба на која ќе го донесеме нашиот главен инструктор Милан Димитриески од Белград. Заедно ќе гостуваме и ветувам дека учениците ќе имаат што да видат и да слушнат од овој мајстор на Уечи Рју Окинава каратето, рече инструкторот по Уечи Рју Окинава карате Борче Видевски.

На часовите по физичко воспитување пред учениците од Гимназијата „Кочо Рацин“ во бели кимона и заедно со Видевски  излегоа уште презентерите Левче Левков, Ана Марија Фаркаш, Анастасија Видевска и Марија Баркова. Тие заедно го демонстрираа и презентираа овој карате стил. Покажаниот интерес на учениците ги поттикна вакви презентации да направат и во останатите средни училишта во градот.