ЦУК: Вчера запалени 33 пожари на отворено и сите попладне и ноќе, а денеска пожарите почнаа од мугрите

Во текот на вчерашниот ден биле регистрирани 33 пожари во 23 општини, од коишто 30 се изгаснати. Според информациите што стигнаа до Секторот за операции и координација во Центарот за управување со кризи (ЦУК), противпожарните тимови (некаде заеднички – здружени од повеќе општини) изгаснале 30 пожари до утрово, а три се уште се евидентираат како активни до утрово. Карактеристично, за вчерашните пожари, е што до пладне немало пријавено пожари – нивното појавување почнало од 13.15 часот. Тогаш наеднаш се пријавени три пожари: два во Скопско и еден во Струмичко, а поголемите пожари почнаа на крајот на денот и доцна во ноќта, а последниот вчерашен беше пријавен во 23.20 часот – пожарот над с.Новоселани во правец кон с.Лепопелци во Општина Чешиново-Облешаво.

При вчерашните пожари горела сува трева, ниска вегетација, мешана и борова шума, а и прагови на железничка пруга. Конкретно, при пожарот што започнал околу 14:30 часот и се уште е активен, кај с.Слепче во Општина Долнени била зафатена ниска вегетација, грмушки и дел од праговите на железничката пруга. Заради опожарување на железничките прагови, а и заради работа за промена на истите, железничкиот сообраќај Скопје – Битола – Скопје, не се одвива. Покрај овој пожар кај с. Слепче, активни се уште два, во: Општина Прилеп, кај с.Алинци, каде што горела сува трева и ниска вегетација и во Општина Сарај, кај с.Радуша при што прво горела депонија, а потоа пожарот се раширил во околната вегетација и во Општина Долнени, кај с.Слепче, каде што гореле сува трева, грмушки и железнички прагови.  Заради опожарување на железничките прагови, односно поради промена на истите, железничкиот сообраќај Скопје – Битола – Скопје, не се одвива.

Инаку, овој ден, за разлика од вчерашниот кога сите 33 пожари беа попладне и во ноќта, денеска денот, од мугрите, почнува со пријавен пожар во 06.50 часот. Конкретно, Регионалниот ЦУК Куманово извести дека пожарникарите од Територјалната противпожарна единица ТППЕ Крива  Паланка од 06:50 часот, со четири пожарникари и со едно противпожарно (ПП) возило интервенираат на пожар кај с. Градец, каде што гори сува трева и борова шума.

ЦУК апелира до граѓаните, да се воздржат од палење огнови на отворено и да не палат отпадоци дури и во нивните дворови, бидејќи ветерот многу лесно може огнот да го пренесе на околната вегетација што е многу сува, а е и многу нарасната оваа година.