Кривична пријава за измама преку Инстаграм: Лажно нудење „сигурни спортски типови“ однесе 2.156 евра

Секторот за компјутерски криминал при Министерството за внатрешни работи поднесе кривична пријава против едно лице поради постоење основано сомнение за сторено кривично дело „Измама преку компјутерски систем“, казниво по член 251-б став 1, а во врска со член 45 од Кривичниот законик на Република Северна Македонија.

Според информациите од МВР, пријавениот во текот на месец февруари креирал лажен профил на социјалната мрежа Инстаграм, со цел да се претстави како лице кое поседува „сигурни спортски типови со загарантирана добивка“. Преку овој профил тој стапил во контакт со оштетено лице и со употреба на лажни факти и фалсификувани документи ја стекнал неговата доверба.

Во лажната комуникација, осомничениот тврдeл дека оштетениот ќе добие исплата од 20.157 евра преку банка, доколку претходно инвестира одредена сума. Уверен во ветената добивка, измамениот граѓанин извршил уплати во три наврати преку финансиски сервис, во вкупен износ од 2.156 евра.

МВР информира дека овие парични средства биле подигнати од страна на пријавениот, кој сега се соочува со кривична одговорност за противправно стекнување имотна корист.

Од Министерството повторно апелираат до граѓаните да бидат крајно внимателни при онлајн комуникација со непознати лица, особено кога станува збор за парични вложувања и ветувања за брза и сигурна добивка.

Истражните органи преземаат натамошни мерки за расветлување на случајот и можно поврзување со други слични измами.

Дума.мк