ДСЗИ: Во необележана просторија од 25 метри квадратни во Струга, вршеле гинеколошки прегледи

16.02.2021

Инспекцијата ќе издаде решение за забрана за вршење на дејност во дивата гинеколошка ординација во Струга поради неисполнување услови за дејноста и ќе го извести Министерството за здравство за одземање на дозволата за работа.

Денеска е извршен вонреден инспекциски надзор по налог од директорот на Државниот здравствен и санитарен инспекторат и по добиени сознанија дека на Кеј 8-ми Ноември во Струга се врши гинеколошко акушерска дејност, спротивно на Закон, здравствени инспектори од Охрид во соработка со службени лица од Министерството за внатрешни работи.

-По двочасовно преговарање со сопствениците на објектот, инспекторите и полицијата влегоа во посочениот простор, кој имал 25 м2 и бил опремен за ординација за гинекологија и акушерство, при што затекнататата фактичка состојба индиректно укажува дека во него се вршела гинеколошко акушерска дејност. Притоа објектот воопшто не бил обележан за дејноста, соопшти Државниот здравствен и санитарен инспекторат.

Просторијата во која се одвивала гинеколошко акушерската дејност е во сопственост на д-р З.П.Ш. доктор специјалист по гинекологија и акушерство, вработена во Јавна здравствена установа „Општа болница Струга“.

При надзорот, приложен е Договор за отстапување на користење на простор каде стои дека просторијата се издава на времено користење на ПЗУ„Д-р Благоја Парталоски“.

Наведената приватна здравствена установа Приватна здравствена установа „Д-р Благоја Парталоски“ има решение издадено од Министерството за здравство од 1999 година дека исполнува услови (простор, опрема и кадар) за вршење на специјалистичко гинеколошко акушерска дејност на наведената адреса, а која во моментот нема носител на дејност бидејќи д-р Парталоски е во пензија од 2009 година а има отстапувања и во однос на просторот, се посочува во соопштението на Инспекцијата.

Инспекциската постапка сѐ уште е во тек и по комплетирањето на севкупната докуменатција, ДСЗИ ќе ги преземе сите мерки согласно надлежностите на Инспекторатот.