Претседателот на државата на средба со претседателот на РКЕ

Претседателот Стево Пендаровски денеска го прими Марко Бислимоски, претседател на Регулаторната комисија за енергетика, соопштија од претседателскиот кабинет.

На средбата се разговарало за стабилноста на македонскиот електроенергетски систем и предизвиците со кои се соочуваме, како и за владината уредба за прогласување на кризна состојба во енергетскиот сектор.

Бислимоски го информирал Пендаровски за активностите што се преземаат и предвидените мерки во иднина, за капацитетите на домашното производство, како и за правата и обврските на носителите на лиценци за вршење на енергетските дејности.

Претседателот Пендаровски посочил дека е неопходно да се преземат сите мерки, со цел успешно справување со предизвиците наметнати од глобалната енергетска криза, санирање на енергетскиот сектор и потребите на пазарот, како и соработка меѓу државните институции и компаниите од енергетскиот сектор.

Одлуката за прогласување на кризна состојба, според претседателот е нужна, со цел поефикасно спроведување на мерките и справување со предизвиците од енергетската криза.