Претседателот Пендаровски им ја врачи Големата годишна награда за архитектура на годинешните добитнички, две дипл. архитектки од Велес

Велешанките м-р Марија Димитриевска и Елена Пазарџиевска, авторки на проектот „Вила за современо домување во викенд населба на велешко езеро Младост“ се годинешни добитнички на Големата годишна награда за архитектура за најуспешно реализирано архитектонско дело во 2022 година.

На двете дипломирани архитектки наградата,вчера вечер, им ја врачи претседателот Стево Пендаровски кој е  покровител на традиционалната манифестација.

Во своето обраќање, претседателот Пендаровски истакна дека оваа манифестација дава извонредна можност да се фрли поглед врз актуелните случувања во македонската архитектура која ги одразува општествените, економските, технолошките и естетските тенденции на национално и меѓународно ниво.

Тој додаде  дека градителството во транзицијата кај нас е обременето од трката за брза заработка и посочи на дилемата со која се соочува секој архитект, како да се задоволи барањето на инвеститорите, а да не се згази врз сопствениот творечки талент и да се гради по мерка на човекот и неговите потреби.

Претседателот ги истакна новите генерации македонски архитекти, за кои рече дека се достојни наследници на нашата позната традиционална архитектура, која сведочи за нашето постоење, нашата култура, етика и хуманизам.

„Посакувам и понатаму да опстојувате на своите убедувања и естетика не правејќи компромис и не компромитирајќи се без разлика на околностите и карактерот на времето во кои живееме. Впрочем, вие сте дел од интелектуалното и критичко јадро во општеството и таа своја улога не смеете да ја загубите или релативизирате“, порача претседателот Пендаровски.

Дума.мк