Снег во Македонија: Пообилни врнежи во западните и во јужните предели
Објавено: 20 јануари, 2026, во 08:57 часот
„Под влијание на циклонска активност и на влажна воздушна маса од Медитеранот која ќе биде поврзана со ладен воздух од север и од североисток на Европскиот Континент, ноќта вторник кон среда и во среда на 21 јануари, во Македонија, од југозапад ќе се прошират врнежи кои ќе бидат обилни со снег. Снег особено ќе паѓа во јужните и во западните предели каде очекувам формирање и проширување на снежната покривка додека на високите и на планинските места зголемување на висината.
Во западните и во јужните предели на државата, во градовите ќе се формира снежна покривка со висина од 5 до 10 сантиметри. Ќе дува слаб до умерен а во Повардарието повремено засилен ветер од југоисточен правец. Во Скопје и околината, со овој бран, ќе има врнежи со слаб до умерен интензитет и тие ќе бидат од дожд и од снег или влажен снег а во околните повисоки места и на планините врнежите ќе бидат само од снег. И во Скопје и околината повремено ќе засилува ветер од југоисточен правец.
Температурите во среда наутро ќе се спуштаат во интервалот од -7 до 1 степени а преку денот тие ќе се искачуваат во интервалот од -2 до 6 степени. Во Скопје утрото температурата ќе се спушти до окоу -3 степени а преку денот ќе се искачи до околу 3 степени.
Поради очекуваните врнежи од снег апелирам на внимателно возење, особено доколку се дижите низ планинските превои каде поради ниските температури очекувам појава на голомразица,“ соопшти метео прогнозерот Славчо Поповски.
Дума.мк
