Дали замрзнатата храна е здрав избор?

24.02.2021

Фрижидерите со замрзната храна се местото каде што се наоѓаат најбезбедните прехранбени производи. Со примена на нови методи во замрзната храна, од технологија до дистрибуција, овие производи стануваат се поприфатливи и препорачливи. Спротивно на општо прифатеното мислење, замрзнатата храна може да биде многу подобар избор доколку знаете што барате и каде да го најдете.

Овде ќе пронајдете неколку вистини за користењето замрзната храна, но и неколку заблуди и зошто не треба да верувате во нив.

Најголемата заблуда во која верува поголем дел од општата популација е дека свежата храна е секогаш подобар избор од замрзнатата. Но, вистината е дека замрзнатата храна е исто толку, а во некои случаи и повеќе хранлива и поздрава според студија на универзитетот во Џорџија.

Свежата храна најчесто се бере пред да созрее овошјето или зеленчукот, потоа се пакува, се испорачува и се продава. Времето потребно „свежата“ храна да стигне на вашата трпеза може да трае и неколку денови, па дури и цела недела, а во текот на тоа време, таа ги губи хранливите материи, особено витамините и минералите. За разлика од овој процес, замрзнатата храна се бери кога е зрела и се замрзнува веднаш по бербата за само неколку часа, па на тој начин ги задржува хранливите состојки.

Уште еден мит во кој се верува е дека замрзнатата храна има многу адитиви и конзерванси. Всушност, замрзнувањето на храната како што е месото, како процес вклучува минимална обработка па затоа и ги задржува максимално хранливите материи.

Токму затоа, замрзнувањето е еден од најбезбедните и најдобрите методи за зачувување на храната. Можете да замрзнете речиси секаква храна!

Исклучок се јајцата и храната во конзерва кои претставуваат едни од ретките видови храна кои не може да се замрзнат.

Но, и храната во конзерва, кога ќе ја извадите може да ја замрзнете. Што значи дека навистина секоја храна може да се замрзне! Колку и да ви звучи чудно, вистина е дека замрзнатата храна нема рок на траење.

Замрзнатото месо може да не се расипе неопределено долго време според Каролин Пасерело, регистриран диететичар и нутриционист, портпарол на Американската академија за исхрана и диететика.

На крај, можеме да заклучиме дека замрзнатата храна е навистина здрав избор, доколку е правилно замрзната и чувана.

Мите Јаначков