Проф. д-р Ќимова: Ефективна комуникација за успех

Ефективната комуникација е основа за успешна интеракција во различни животни области, како што се професионалниот, академскиот, личниот и интеркултурниот контекст. Способноста да се пренесат пораки на јасен и разбирлив начин, прилагодувањето на стилот според соговорникот, ситуацијата и вештината за слушање се клучни за постигнување на ефективна комуникација.

Во личните односи, комуникацијата е основа за меѓусебно разбирање и доверба. Активното слушање и покажувањето интерес за чувствата на другите ја зајакнува врската. Отвореноста и искреноста помагаат да се избегнат недоразбирањата и конфликтите. Ненасилната комуникација користи „јас“ изјави за да ги изразиме нашите чувства и потреби без да го предизвикаме соговорникот да се брани. Ова значи дека зборуваме од сопствена перспектива, на пример, „Јас се чувствувам непријатно кога доцниш, затоа што ми е важно да го почитуваме договореното време.“ Со ова, го изразуваме нашето чувство и потреба, наместо да го обвиниме соговорникот (на пример, наместо да кажеме на повисок тон „Ти секогаш доцниш и не ме почитуваш!“).

Во деловното опкружување, јасната и прецизна комуникација е суштинска за ефикасност. Важно е пораките да бидат кратки, суштински, со користење на професионална терминологија. Активното слушање овозможува разбирање на идеите и потребите на другите, што помага за поефикасна соработка. Дополнително, изборот на соодветен медиум е важен – важните теми можат да се дискутираат лице во лице, додека за кратки известувања е-пошта или пораки може да бидат доволни.

Во глобализираниот интеркултурен свет, комуникацијата со луѓе од различни култури бара отворен ум и културна освестеност. Свесноста за различните културни норми и вредности помага да се избегнат потенцијалните недоразбирања. Стереотипите треба да се избегнуваат, и да се прифати секој поединец како уникатен, посебен и вреден за почит. Флексибилноста и адаптибилноста се клучни, бидејќи стилот на комуникација може да варира – некои култури претпочитаат директен пристап, додека други се повеќе индиректни.

Во образовен контекст, јасните насоки и повратен фидбек се клучни за напредокот на учениците. Наставниците можат да охрабрат критичко размислување со поставување прашања кои поттикнуваат анализа и дискусија. Активната интеракција и инклузивност во училницата го прават учењето поефективно и помагаат секој ученик да се чувствува поддржан. Наставниците треба да ги прилагодат методите според потребите на учениците за да се обезбеди разбирање на материјалот.

Невербалните знаци во ефективната комуникација, играат суштинска улога бидејќи го дополнуваат и засилуваат значењето на изговорените зборови. Контактот со очи, изразите на лицето и говорот на телото помагаат во преносот на емоции и ставови, градејќи доверба и разбирање со соговорникот. На пример, пријателскиот тон и насмевката создаваат отворена и поддржувачка атмосфера, додека соодветниот контакт со очи покажува внимание и почит. Невербалната комуникација е, затоа, клучна за постигнување јасност и взаемно почитување во сите форми на комуникација.

Континуирано треба да се работи на подобрување на комуникацијата, во таа насока неколку препораки за подобрување на ефективната комуникација: Активно слушање – Слушајте без прекинување и поставувајте прашања дали добро сте го разбирале соговорникот;  Користење на „јас“ изјави – Изразувајте се од сопствена перспектива за да избегнете да го обвините соговорникот; Емпатија – Ставете се во позицијата на соговорникот за подобро разбирање; Јасна и прецизна комуникација – Користете кратки и разбирливи изрази, зашто големината е во едноставност; Емоционална интелигенција – Препознавајте и управувајте со своите и туѓите емоции; Позитивен говор на тело – Одржувајте отворена положба и контакт со очи; Конструктивен фидбек – Дајте конкретни и насочени препораки; Пауза во разговорот – Користете кратки паузи за подобро разбирање и одговор.

Ефективната комуникација е темел на успешна интеракција, која гради доверба и меѓусебно разбирање во професионални, лични и интеркултурни средини. Разбирањето на вербалните и невербалните аспекти на комуникацијата овозможува појасен пренос на пораки и намалување на можностите за недоразбирање. Одржувајте чекор со дополнителни информации на страната на Ин асоцијација.

проф.д-р Ѓорѓина Ќимова

Професор на Меѓународен Славјански Универзитет ,,Свети Николе,,

Свети Николе , Република Северна Македонија