Судијката Тодорова не дозволи присуство на новинарка на рочиштето „Пратеник Јамалов против советник Смилев“, во Основен суд Велес

Не можеше новинарка на Дума.мк, денеска, да влезе во судницата на Основен суд во Велес во која што се одржуваше судењето по прекршочната пријава на пратеникот Александар Јамалов против членот на Совет на Општина Велес, Игор Смилев. Судијката Лорета Тодорова не дозволи авторката на овој текст да го следи рочиштето П5-7/24 на кое што пратеникот Јамалов во прекршочна постапка го тужи советникот Смилев „за навреда, за клевета и за нанесување на душевна болка“ поради дадена изјава за весникот „Фокус“ во која што изјавил дека „сопругата на Јамалов била вработена во СВР Велес откако тој бил избран за пратеник“.

Судијката Тодорова не му ги соопшти причините на судскиот полицаец зошто не дозволува присуство на јавност во судницата.

Авторката на овој текст не доби одговор ниту од претседателката на Основен суд Велес, Валентина Ѓоргиевска. Претседателката не одговори на телефонскиот повик на новинарката туку напиша порака дека е во странство. Но, Ѓоргиевска не одговори на пораката од новинарката „На кого да му се обратам, бидејќи судијката Лорета Тодорова не дозволува јавност? И зошто?“

На новинарката, авторка на оваа вест, ова и се случува за прв пат, да не и биде дозволено да следи судски процес во Основен суд Велес.  

Убавка Јаневска