Зголемен број на предмети за семејно и насилство врз жени, во Основен суд Велес средба на надлежните институции

Во граѓанскиот оддел на Основен суд Велес од почетокот на 2025 година до овој месец, примени се вкупно 52 предмети, од кои 6 само во месец ноември, за насилство врз жените и семејно насилство. Предметите ја актуелизираат состојбата и се сериозен предизвик за институциите кои работат на заштита на жртвите. Зголемениот број на предмети го поттикна Основен суд Велес да организира и реализира меѓуинституционална средба со претставници на Основно јавно обвинителство, Сектор за внатрешни работи Велес и Центар за социјални работи Велес. Присутните судии, обвинители, полициски службеници и социјални работници, договориле  поефикасна соработка и поголема меѓусебна координација за заштита на жртвите.

„Сите присутни едногласно се согласни дека насилството врз жените и семејното насилство се клучен проблем и присутните институции даваат приоритет во постапувањето, затоа што претставуваат најгруб начин на повреда на човековите права и слободи како и облик на дискриминиација врз жените. Тие едногласно се согласни дека меѓуинституционалната соработка и разгледувањето на проблемите со кои се соочува секоја од надлежните институции со цел сите заедно сеопфатно и координирано да постапуваат и комуницираат, да ги усогласат активностите што ги преземаат како субјекти инволвирани во помошта и поддршката на жртвите и утврдување на одговорноста на сторителите,“ соопшти Основен суд Велес.

За надминување на проблемите кои се јавуваат во постапките пред Основниот суд било заклучено да продолжи координираната соработка на сите институции и да се вклучи ЈЗУ Општа болница Велес. Исто така строго да се почитува интегритетот, приватноста и достоинството на жртвите.

Убавка Јаневска