„Џоломарите“ од Ресава парите собрани за Василица ќе ги вложат во старото училиште за развој на етно туризам

Парите коишто ги собраа на Василица, Џоломарите од кавадаречкото село Ресава, одлучиле да ги вложат во реконструкција на старата училишна зграда прво, во отворање на Етно соба а потоа и во апартмани, за престој на туристите. Селото Ресава се наоѓа близу Тиквешко Езеро.

Оваа група на интересни карневалски маски, која танцува специфични танци и изведува ритуали за бркање на лоши духови, е составена од луѓе кои потекнуваат или живеар во ова кавадаречко село. Затоа сакаат да ги промовираат природата, Тиквешко езеро, производите на вина и ракии од Тиквешкото виногорје како и историјата и традицијата.

Џоломарите не се атракција само на кавадаречкиот, струмички, прилепски и вевчански карневали туку имаат освоено награди и на фестивали и карневали во странство. Тие играат и создаваат врева затоа што на себе имаат клопотарци а носат и стапови.

Сепак, како што изјавија за МИА, џоломарството е исконска традиција на овие простори и тие ја одржуваат секоја Василица кога се наградувани со пари од страна на граѓаните во Тиквешкиот регион.

Убавка Јаневска