Групниот костим „тик – так“ најдобар во ООУ „Блаже Конески“, одржана „Априлијада“ во сите основни училишта во Велес

Општинското основно училиште „Блаже Конески“ денеска беше само едно од вкупно четирите во Велес со програма „Априлијада“ посветена на Денот на шегата. Таму попладнево под маски и костими продефилираа учениците додека жири комисија прогласи најдобра групна маска. Оваа титула ја освои  групната маска на III 1 oдделение чии костими изгледаа како бонбоните „тик – так“.

Нивната наставничка Весна Јовевска заедно со колешката Елена Тембелеска објасни како ја донеле одлуката денеска нивните ученици да бидат „бонбони тик так“.

-Одлуката ја донесовме сите заедно поточно децата, родителите и ние наставничките за потоа да продолжиме со заедничка изработка. Тоа мислам дека придонесе за резултатот што денеска го постигнавме и на кои сите му се радуваме, рече Јовевска.

Лицата на учениците од III 1 одделение беа озарени од среќа и радост. Особено беа горди на фактот што се најдобри во натпревар во којшто учествуваат со костим што тие го создале како и што не носат купени костими од продавници.

Први Април – денот на шегата беше одбележан и во ООУ „Васил Главинов“, „Панко Брашнаров“ и „Свети Кирил и Методиј“. Секаде имаше многу смеа, кажување на шеги и голем број на убави костими кои беа инспирирани од јунаците на детските бајки, сказни или јунаци од филмови. Беа прогласени најиновативна и најсмешна маска како и најдобра групна маска. Најдобрите беа наградени со Благодарница.

Манифестацијата „Априлијада“ финансиски е поддржана од Општина Велес.

Убавка Јаневска