ЗГ„Акцијаш ветерани“ го направија пристапен Крстот над црквата за жителите на Бањица, во Општина Чашка (фото)
Објавено: 19 април, 2026, во 17:02 часот
Подготвија бетон, нивелираа површина од 100 м2 на платото под Крстот над црква „Свети Спас“ во село Бањица, собраа и товарија 6 кубика шут од стари ќерамиди и успеаја да наполнат ѕид долг 7 метри со бетон, денеска, 15 членови на ЗГ„Акцијаш – ветерани“. Работната траса на која работеа се наоѓа веднаш под Крстот во црковниот двор.
На акцијашите ветерани им се придружија и жители од село Бањица, членови на Црковниот Одбор како и поранешниот Градоначалник на Општина Чашка, Горан Стојановски.
-Одговоривме на барањето на Одборот на црквата и им помогнавме на жителите на село Бањица. Добро се организиравме, работниот материјал беше набавен и нашата ефективна работа од шест часа даде краен резултат. Сега глетката е поубава а и пристапот на жителите на селото до крстот е олеснет , рече претседателот на ЗГ „Акцијаш ветерани“ Горан Петков.
Црквата „Свети Спас“ е обновена и е еден од поубавите духовни храмови во општина Чашка.
Убавка Јаневска
