Жителите на Рамина, чии куќи ги урна земјеното свлечиште, од државата не добиле два месеци пари за кирија
„Државата ни ги укина парите за кирија, нам на педесетина велешки семејства чии куќи ги урна свлечиштето Рамина,“ тврдеа денеска претседателот на координативното тело на овие жители, Таир Алиев и негови соседи. Тие велеа дека втор месец не добиле пари, а не знаат зошто и дека се принудени да се снаоѓаат или како што велат да останат на улица. Од центарот за социјални работи ги известиле дека пари нема но не им кажале која е причината.
„Бараме да ни овозможат или куќи или трајно да ни го решат проблемот. Ова вака веќе не оди. Петнаесет години е проблемов со Рамина, децата ни пораснаа а ние уште под кирија седима и уште ни ја укинаа киријата. Ова е срамота, рече Таир Алиев.
„Сега шо ќе правиме, ќе се снаоѓаме, ќе одиме по роднини, каде ќе не примат таму ќе седиме, рече Иванов Бошко.
Единаесет години овие семејства седат под кирија, што им ја плаќаше државата. На петчлените семејства по 75 евра, на тро и четворочлени по 60 а на двочлени семејстваљ по 50 евра, откако нивните домови ги урна земјеното свлечиште на Рамина. Надлежните во повеќе наврати им ветија станови но до денес не се изградија. Сега тие велат дека се соочуваат со голем проблем, да останат на улица.
„Ќе дојдат пред избори, ќе ветат и ќе си заминат. До ден денес е така. И тие претходно а и овие идеа и велеа дека со потпорните ѕидови Рамина е санирана, ама кај е санирана, луѓето уште под кирии живеат, живееме во деформирани куќи, рече Али Шакиров.
Од центарот за социјални работи не добивме објаснување, директорката имала состанок или била излезена. Единствено службеник во центарот ни објасни дека киријата што ја добивале семејствата од Рамина е влезена во еднократна парична помош, а таа била укината за време на изборен процес.
Проблемот со свлечиштето во велешката населба Рамина, на ридот под Свети Илија, се провлекува цели петнаесет години. Кога таму земјата се свлекуваше седумдесетина семејства останаа без покрив над главата. Дел од нив изградија нови куќи, на деветнаесет семејства државата им додели бараки, а на останатите им ја плаќаше киријата. Изградбата на двата потпорни ѕидови го сопре свлечиштето, но не и проблемите на овие луѓе. Разни политички гарнитури ветуваа трајно решение на проблемот, но тоа до сега не се случи./Д.С