Петте клона на градинката Димче Мирчев ќе добијат термоизолациони фасади со европски пари
Европската унија даде пари со кои ќе се реализира проектот за енергетска ефикасност со цел институциите под надлежност на локалната самоуправа да штедат енергија.
„Осумдесет и две илјади евра ќе бидат искористени за поставување на термоизолациони фасади на петте објекти на градинката. Останатите пари ќе се искористат за меѓугранични средби , изработка на елаборати, студии и техничка документација, со кои општина Велес и во иднина ќе може да аплицира за проекти од европските фондови“, рече Славчо Чадиев, градоначалник на Велес.
Во проектот за прекугранична соработка се вклучени и општина Прилеп и три општини од Грција. За овој вид соработка Европската унија одобри 800 илјади евра. Сто илјади евра се предвидени за поставување на термофасадите во градинките, а со свои пари ќе учествува и општината, од буџетот за оваа намена ќе издвои 22 илјади евра. За спроведување на проектот општината ќе отвори и канцеларија во која ќе биде вработено едно лице.
„Општина Велес ќе добие и опрема за канцеларија, компјутер и канцелариски мебел. Ќе се обезбеди и едно работно место во времетраење додека се имплементира проектот“, рече Чадиев.
Ако не се реализираат некои од овие проекти во општините, во предвид ќе се земат резервните. Општина Велес аплицираше проект и преку Јавното комунално претпријатие.
„Прва резерва е Дервен, доколку не се реализира некој проект за јавното комунално претпријатие ќе биде одобрен грант од 248 илјади евра.
Покрај Општина Велес, од ИПА инструментот за прекугранична соработка со Грција средства доби и Вардарскиот плански регион. Проектот е вреден 270 илјади евра, рече Чадиев.
„Енерџинет“ е насловен проектот кој предвидува буџет за енергетска ефикасност. Инаку општина Велес континуирано работи на зголемување на енергетската ефикасност во институциите, особено училиштата, преку промена на врати и прозорци и модернизација на парното греење./Д.С