Уште десеттина дена до постилање на тревата на Градски стадион
На фудбалскиот терен на Градскиот стадион се става подлогата врз која ќе треба да се стави вештачката трева која градот ја доби како донација. Оваа фаза од уредувањето на игралиштето ќе треба да заврши за десеттина дена. Претходно беше поставена дренажата. Штом завршат градежните работи ќе се постеле тревата која е прв услов градот да го нуди стадионот за одигрување на меѓународни натпревари.
Реконструкцијата на трибините е планирана во друга фаза како и уредувањето на зеленилото со поправката на околниот ѕид. Општината има проект со кој може комплетно да му се смени сегашниот лик на стадионот. Во него, вели градоначалникот Славчо Чадиев се содржани сите потребни поправки, намалување на димензијатана атлетската патека во корист на трибините.
– Тоа ќе бара подолг процес на реконструкција уште најмалку две години. Проектот содржи изградени трибини со пет илјади места за седење , 14 тоалети, посебен вид на соблекувални и осветлување. Со него ќе може да се обезбеди гостување во Велес и одигрување на натпревари на Б репрезентации на овој терен. Тоа е опција која може да се реализира со јавно приватно партнерство затоа што инвеститорот ќе може да го користи долниот дел на стадионот, во кој се планирани рестораните, кафетерии и продавници. Постојат неколку варијанти за нив сепак треба да се изјасни советот, рече Чадиев.
Тој е задоволен како сега течат работите со реконструкцијата на теренот. Се сложи со констатацијата дека дел од стариот ограден ѕид на стадионот, кај главниот влез, е небезбеден и ризичен. Градоначалникот соопшти дека нема да се чека туку стручните служби на општината прават проценка за да се пристапи кон санација.
– Секако тоа мора да се санира. Архитектите знаат и прават проект за санација. Во исто време работиме и на обезбедување на безбедност за гледачите кои седат на главната трибина под тополите кои се ветви. Милам дека по триесеттина до четириесет години тие си го извекувале векот и ќе мора да се отстранат за да не се случи некоја катастрофа. Ние мораме да се грижиме за комплетната безбедност, рече Чадиев.
На прашањето колку дрвја ке насади на местото на десеттината тополи кои ќе мораат да се исечат Чадиев одговори дека општината ќе засади двојно повеќе.
До сега во реконструкцијата на фудбалскиот терен на стадионот се инвестирани околу 500 000 евра ,пари донација од УЕФА, како и дел на општината.
