Поевтинија уште 352 лека
Објавено: 18 март, 2014, во 15:26 часот
Во пресрет на изборите Министерството за здравство донесе одлука со која од денеска ќе се намали цената на вкупно 352 лека, од кои 218 генерички и 134 иновативни лекови и оригинатори. Меѓу нив се лекови за болничка употреба, како и такви кои се купуваат од аптека.
Иако поевтинувањето се прави согласно последните измени во Законот за лекови и донесената методологија за начинот на формирање на цените на лековите кое се прави два пати годишно, во октомври и март, министерот за здравство, Никола Тодоров, ја искористи можноста да се пофали дека вкупната заштеда на годишно ниво ќе изнесува 3.224.210 евра.
Ќе дојде до намалување на лековите за висок крвен притисок, аналгетици, антибиотици, антимикробни лекови, антивирусни лекови, седативи, антиревматски, како и лекови кои делуваат на желудник и гастроинтестинален систем, имуносупресиви. Кај генеричките лекови просечното намалување изнесува околу 18,42 проценти.
