Граѓаните го сардисаа германски “Дрекслермаер“ со барања за работа!
Сеуште граѓаните се интересираат како да стигнат до работно место во фабриката на Германците. Тоа е топ тема не само во овој град, туку и во цела Тиквешија.
Сите се надеваат дека со вработување овде ќе обезбедат постабилна егзистенција за своите семејства.
Она што засега е познато е дека една група веќе вработени граѓани во “Дрекслермаер“ беше на обука во Романија и Германија. Се вратија од таму и сега ги обучуваат останатите 140 работници кои во моментов стекнуваат искуство во погонот лоциран во просториите на “ИГМ„. Во меѓувреме градежната механизација е на терен и интензивно работи на изградба на халите на фабриката. Локацијата е на влезот во Кавадарци од страната на Росоман.
Дознаваме дека планот на германските газди е до крајот на годината да вработат 300 лица, а следната година бројот на вработени да достигне 2000. Кавадарчани добиле висока оценка од нив за работоспособноста која ја поседуваат.
“Околу 80 % од оние што се селектираат од Заводот за вработување во Кавадарци завршуваат со договор за работа во “Дреклсермаер“, што не е случај ниту со работниците во Германија, Романија и други земји каде се интервјуираат кадри за фабриките на оваа компанија ширум светот. Кавадарци има работната сила со висок степен на квалификуваност,“ рече градоначалникот, Александар Панов
Панчо Минов, советник во кавадаречкиот совет на последната седница обвини дека во германската фабрика се вработуваат само членови на ВМРО-ДПМНЕ. Смета дека до работа треба да стигнат сите граѓани што се способни да одговорат на задачите кои се бараат во производните погони.
“Неможе да се вработуваат само членови на ВМРО-ДПМНЕ. Дека има партиски вработувања се почесто коментираат и граѓаните. Тоа мора да прекине. До работа треба да дојдат сите кои се способни, независно на која политичка опција припаѓаат“ рече Минов.
Колку е актуелен германскиот инвеститор се виде и на седницата на советот. И ова не е прв пат да се зборува за тамошните вработувања. Тоа е од разбирливи причини, бидејќи на Заводот за вработување чекаат над 5.000 граѓани.