Ова е Роузи: Има над 130.000 следбеници и изгледа совршено, но не е вистински човек
Роузи на социјалната мрежа „Инстаграм“ ја следат повеќе од 130.000 луѓе, со нив споделува фотографии од нејзините авантури, нејзината шминка е секогаш беспрекорна, секогаш е дотерана ѝ изгледа како да се симнала од некоја модна писта… Роузи е модел, пее, танцува, но, ништо од тоа е вистинско.
Рози е јужнокорејска виртуелна инфлуенсерка, дигитално прикажана личност која е толку реална што луѓето често претпоставуваат дека е вистинска жена, иако не е.
„Дали си вистинска личност или си робот?“ – е едно од најчестите прашања под нејзините фотографии.
Имено, Роузи е создадена од компанијата „Sidus Studio X“ со седиште во Сеул, Јужна Кореја. Тие велат дека таа е „способна да прави сè што луѓето не можат да го направат, и го прави тоа во најчовечка форма“, пренесува „CNN“.
Оваа виртуелна инфлуенсерка потпишала договори со многу брендови и веќе има спонзорства, а воедно се најде и на модните писти на виртуелни модни ревии, па дури и објави два синглови.
Несомнено, индустријата за виртуелни луѓе е во подем, а со тоа и сосема новата економија во која инфлуенсерите никогаш не стареат, не предизвикуваат скандали и се дигитално беспрекорни, предизвикувајќи тревога меѓу луѓето кои се опседнати со недостижните стандарди за убавина.
Како функционираат виртуелните инфлуенсери?
Технологијата „CGI – Computer Generated Image“ која стои зад Роузи не е ништо ново. Оваа технологија е сеприсутна во денешната забавна индустрија, каде што уметниците ја користат за да создадат „реални“ нечовечки ликови во филмови, компјутерски игри и музички спотови. Но, од неодамна се користи и за создавање инфлуенсери.
„Sidus Studio X“ кога креира слика на Роузи, користи технологија и ја создава од глава до пети, што е идеално за совршени фотографии на „Инстаграм“.
Како и нивните колеги од реалниот живот, виртуелните инфлуенсери имаат следбеници на социјалните мрежи, каде што објавуваат снимки од нивните „животи“ и комуницираат со своите фанови. На профилот на Роузи се гледа како таа патува во Сингапур и ужива во чаша вино, а обожавателите постојано ѝ даваат комплименти за нејзините аутфити.
На постарите генерации можеби им е чудна интеракцијата со „виртуелна личност“, но експертите велат дека виртуелните инфлуенсери навистина им се допаѓаат на младите Корејци, кои, за жал, поминуваат голем дел од својот живот на Интернет.
Ли На-кјонг, 23-годишна девојка од Инчеон, почнала да ја следи Роузи пред околу две години мислејќи дека е вистинска личност. И Роузи ја заследила, понекогаш дури и коментирала на нејзините објави, станале виртуелни пријателки, а тоа продолжило дуи и откако Ли ја дознала вистината.
„Комунициравме како пријателки и се чувствував удобно со неа. Не ја гледам како производ на вештачката интелигенција, туку како вистинска пријателка. Ја сакам нејзината содржина. Таа е толку убава“, изјави Ли.
Профитабилен бизнис?
Социјалните медиуми не само што им овозможуваат на виртуелните инфлуенсери да прилвлечат голем број следбеници, туку од таму доаѓаат и парите. Инстаграм-профилот на Роузи е полн со спонзорирани објави каде таа промовира производи за нега на кожа и модни производи.
„Многу големи компании во Кореја сакаат да ја имаат Роузи како модел. Оваа година очекуваме дека ќе заработиме повеќе од 1,52 милиони долари само од Роузи“, откри извршниот директор на „Sidus Studio X“, Баик Сеунг-јуп.
Како што расте популарноста на Роузи, компанијата добива се повеќе спонзорства од луксузни брендови како „Chanel“ и „Hermes“. Нејзините реклами се појавуваат на телевизија, па дури и во „офлајн простори“ како билборди и автобуски постојки. Моделите се многу барани бидејќи им помагаат на брендовите да допрат до помладите потрошувачи. Освен модата и убавината, меѓу клиентите на Роузи се и компаниите за животно осигурување и банки, кои вообичаено се сметаат за „старомодни“.
Извршниот директор го наведува и фактот дека, во споредба со некои од нивните реални колеги, ваквите виртуелни ѕвезди полесно се одржуваат. Потребни се неколку часа, понекогаш и неколку дена, за да се создаде фотографија од нивните ѕвезди, а два дена до неколку недели за видео реклама. Тоа е многу помалку време и работа отколку што е потребно за работа со вистински луѓе каде што се трошат недели и месеци во барање локации, подготовка, осветлување, фризура, шминка, стајлинг, постпродукција…
И, исто така, виртуелните инфлуенсери никогаш не стареат, никогаш не се заморуваат од тоа и не се контроверзни. Јужнокорејскиот малопродажен бренд „Lotte Home Shopping“ создаде своја виртуелна инфлуенсерка, Луси благодарение на која имаат голем профит. Имено, компанијата претходно ангажирала вистински луѓе за рекламите на своите производи, кои според нив „чинат многу и ќе се променат кога ќе остареат“. Така дошле до Луси, која засекогаш ќе има 29 години. „Луси не е ограничена со време или простор. Таа може да се појави насекаде. Нема морални проблеми“, велат од „Lotte Home Shopping“.
Наметнување на нереален стандард на убавина?
Јужна Кореја не е единственото место што ги прифати виртуелните инфлуенсери. Меѓу најпознатите виртуелни инфлуенсери во светот се Лил Микела, која е создадена од ко-основачи на американски стартап за технологија и има повеќе од три милиони следбеници на „Инстаграм“. Лил работи со брендови како „Calvin Klein“, „Prada“ други. Друга виртуелна инфлуенсерка е Лу до Малагу, која е продукт на бразилска малопродажна компанија и има речиси шест милиони следбеници на „Инстаграм“.
Според професорката на Универзитетот Инха, виртуелните инфлуенсери во другите земји имаат тенденција да ја одразуваат различноста на етничкото потекло и идеалите за убавина, додека во Кореја тие секогаш се „убави и ги одразуваат вредностите на земјата“. Инаку, во Јужна Кореја, која често се нарекува престолнина на пластичната хирургија, постои загриженост дека виртуелните инфлуенсери би можеле дополнително да поттикнат нереални стандарди за убавина.
