Изложба со фотографии на италијанскиот фотограф Матео де Мајда во Дом на култура – Кавадарци

Италијанскиот фотограф Матео де Мајда во текот на претходното лето, додека фудбалската репрезентација на Република Северна Македонија се подготвувала за големиот настан, европско првенство,  заедно со новинарот Козимо Бизари ја пропатувале нашата земја и ги следеле нашите фудбалери додека се подготвувале за еден од најголемите спортски настани во својата историја.

Во таа чест, ќе биде отворена изложба на фотографии насловена „За прв пат (La prima volta)“, во вторник, на 14 декември, со почеток во 18:00 часот,  во просториите на Галерија при дом на култура „Иван Мазов –Климе“ во Кавадарци. За време на отворањето ќе биде презентирана кратка видео приказна за познатиот македонски фудбалер Горан Пандев. Изложбата ќе биде дел од „Кавадаречка култура есен 2021“ и ќе биде организирана според предвидените протоколи за заштита од коронавирусот.  

Исто така, кавадарчани во текот на неделата ќе имаат можност  да ги погледнат репризите од театарската претстава „Не сега драга“ според текст на Реј Куни и во режија на Диме Боцев. Претставата е комедија на забуни, ситуации и интересни ликови и е препорачана за публика постара од 16 години. Во претставата играат: Диме Коцевски, Магдалена Атанасова, Видан Станоев, Надица Анѓелкова, Александар Малинков, Александар Видиков, Сијче Трајкова, Диме Боцев и Сашко Орешков.

Репризите на оваа театарска претстава ќе бидат организирани според сите протоколи за заштита од коронавирусот. Поради ограничениот број на дешита билетите може да се резервираат на тел. број 075-347-370 само со СМС порака секој работен ден од 09:00 до 14:00 часот. Влезниците се подигнуваат од билетарница на Дом на култура од 17:00 до 18:30 часот, доколку не се подигнат се пуштаат во продажба. На денот на претставата остатокот од билетите се продаваат по цена од 100 денари, на билетарницата од 17:00 до 19:00 часот

Во продолжение репертоар на репризните изданија на претставата „Не сега драга“:

Вторник, 14 декември со почеток во 20:00 часот.

Среда, 15 декември, со почеток во 20:00 часот.

Петок, 17 декември, со почеток во 19:30 часот.

Понеделник, 20 декември, со почеток во 20:00 часот.

Стефани Манева