Во Велес, започнаа 54 – Детски Рацинови средби со промоција на четири книги за деца

Литературната манифестација, годинава, во родниот град на Рацин започна со промоција на книгите за деца и млади „Насмеани стихови“ од Сузана Мицева, „Борко брзозборко“ од Ксенија Маказлиева Трајчева, „Календар на детството“ од Киро Донев и „Детето со ѕвезда на челото“ од Ана Витанова Рингачева. Издавач на овие книжевни дела е издавачката куќа „Просветно дело“. Збирките на поезија и на проза ги содржат литературните прилози објавени во списанијата за деца на издавачот „Детска радост“. Издавачката куќа „Просветно дело“ веќе трета година е партнер на Детски Рацинови средби и ги обезбедува наградите како за учесниците на литературниот така и за учесниците на поетскиот конкурс.

-Заедничко за сите три стихозбирки е што се илустрирани, значи што го следат современиот тренд во литературата за деца особено кога е наменета за помала возраст. Стихозбирките и прозното дело се излезени во услови на ковид пандемија и жалиме што за нив не можевме да организираме промоција со физичко присуство. Авторите творат и издаваат се со една, единствена, цел во мисија на детето, да се развива високиот критериум во пишувањето за деца, рече Ксенија Маказлиева Трајчева, уредник на списанијата за деца „Росица“ и „Другарче“.

Детските рацинови средби продолжуваат во спомен куќата на „Коста Солев Рацин“ кадешто децата ќе имаат можност да ги прочитаат своите творби. Според Трајчева, многумина од децата но и писателите своите први објави ги имале токму во списанијата „Росица“ и „Другарче“ како и во „Наш свет“ и во „Развигор“.

-Денеска заедно со нас се Сузана Мицева како и Ана Витанова Рингачева којшто некогаш биле дел од Детските Рацинови средби . Талентот бил препознаен и денеска се веќе автори за деца, професори, новинари и докажани имиња коишто соработуваат со нас и години подоцна ги издаваат своите книги за деца за коишто ми е особено драго, чест и гордост, додаде Трајчева.

Оваа манифестација ги препознава талентите од мали нозе и учесниците на Детски Рацинови средби подоцна прераснуваат во автори за деца. Промоцијата беше организирана во Ликовен салон согласно протоколите за заштита од вирусот Ковид-19.

Врачувањето на наградите од литературниот и ликовниот конкурс за 54 Детски Рацинови средби,  ќе се одржи во 13:00 часот во сала „Бели Мугри“.

Стефани Манева