Чиј имунитет е подобар, на вакцинираните или на прележаните?

Најновата одлука на Владата да дозволи нерестриктивен влез во објекти и настани од отворен карактер, за оние граѓани што прележале ковид-19 најмногу пред 45 дена, наиде на остри реакции кај дел од медицинската заедница. Се кршат копјата околу тоа кој имунитет е подобар и подолг, дали оној што е создаден по прележување на болеста или оној што е создаден со вакцинацијата. Дел од медицинските професионалци во земјата сметаат дека периодот од 45 дена е премногу краток и дека граѓаните кои ја прележале болеста тогаш имаат природна заштита и вакцина не им е потребна. Но, има и научни студии и ставови на релевантни здравствени институции кои сугерираат што порана вакцинација после прележувањето

Пишува: Мирослава Бурнс

Јасно е дека тие што имаат прележано ковид, имаат имунитет односно антитела. Но, според министерот за здравство, Венко Филипче тој имунитет од прележаност на болеста по определено време почнува да опаѓа. Затоа, се препорачува да се прими вакцина, која го засилува имунитетот веќе стекнат со прележаноста.

Сè сублимирано што знаеме е дека имунитетот од вакцината штити многу повеќе од прележана болест. Има една студија која вели дека оние што се вакцинирани може да заболат со ризик од 0.07 проценти, а од прележаните може да заболат 1.2 проценти. Што значи дека кај нив е поголем ризикот. И оттука е таа препорака дека што пократко време по прележувањето да се прими вакцина, за околу 45 дена. Тоа е нешто што дополнително на граѓаните им го штити здравјето. Американскиот центар ЦДЦ има препорака да се прими вакцина после 10 дена од направениот тест кај асимптоматски пациенти. Сите сериозни големи студии на голем број испитаници одат во насока на тоа и тоа е ставот и на Светската здравствена организација. Дека што порана вакцина, дополнително го штити здравјето, изјави Филипче.

Професорот на Медицинскиот факултет, доктор Никола Пановски смета дека вакцина толку рано по прележувањето (45 дена) не е потребна. Тој го сподели следниов графикон и напиша:

Еве од втора година медицина, секој студент што го знае, нека одговорат врвните експерти на кои се повикува Министерството за здравство. ИгГ заштитните антитела се со црна линија. 12 недели се високи и остануваат високи!!! Вие ги терате да се вакцинираат најдоцна во седмата недела кога имунитетот е најсилен. Зошто да се вакцинираат во периодот кога нивната природна заштита е најизразена?, прашува доктор Пановски.

Тој истакнува дека во светот има земји кои препорачуваат вакцинација за прележаните по 9, па и по 12 месеци по прележувањето на болеста. Како пример посочува дека во Швајцарија може да се оди со документ за прележаност која се случила не порано од 12 месеци, како и дека без вакцинација може да се патува и во земјите од  ЕУ.

Професорот на Медицинскиот факултет, доктор Драган Даниловски во изјава за „Вистиномер“ посочи  студија како доказ дека имунитетот од прележувањето е подолг и подобар од имунитетот од вакцините.

Во студијата биле вклучени вкупно 2.653 луѓе, кои биле целосно вакцинирани со две дози вакцина и 4.361 пациент кои прележале ковид. Повисок титар на антитела се опсервирани кај вакцинираните со две дози по втората доза, отколку кај прележаните. Меѓутоа, кај вакцинираните титарот на антитела опаѓал 40 проценти секој следен месец, додека кај прележаните тој опаѓал за 5 проценти секој месец.

За шест месеци по вакцинацијата, 16.1 процент од вакцинираните имале ниво на антитела под границата на серопозитивност, додека 10.8 проценти од прележаните имале ниво под границата на серопозитивност 9 месеци по инфекцијата. Заклучокот на студијата е дека индивидуите вакцинирани со „Фајзер“ вакцината имаат различна кинетика на нивоа на антитела споредено со оние кои прележале ковид со повисоки иницијални нивоа. Антителата многу брзо експоненцијално исчезнуваат кај вакцинираните.

Доктор Злате Мехмедовиќ за „Вистиномер“ вели дека неточни се тврдењата оти прележувањето на болеста секогаш ви дава поефикасен и подолготраен имунитет од оној што се развива како резултат на вакцинацијата.

Во одредени случаи прележувањето дава подобар имунитет, а во останатите случаи вакцините се тие кои даваат поквалитетен имун одговор. Добар пример за тоа ние е хуманиот папиломавирус ХПВ. Во случајот на ХПВ инфекцијата, имунитетот стекнат со вакцина е посилен од природниот имунитет. По истиот принцип вакцините за тетанус, haemophilus influenzae тип Б (Hib) и пневмокок се оние кои предизвикуваат подобар имунолошки одговор наспроти природната инфекција, односно имунитет. Би издвоил две студии кои потврдуваат дека имунитетот стекнат преку вакцинација против Сарс Ков 2 е подобар или, посоодветно кажано, е поквалитетен во однос на имунитетот стекнат со прележување на болеста. Притоа, сакам да напоменам дека со студиите не се докажува оти по прележувањето на болеста нема да имате никаков имунитет, туку дека вакцинираните имаат значително подобар и поквалитетен имун одговор во однос на оние кои биле инфицирани со коронавирусот, вели доктор Мехмедовиќ.

Тој додава дека врз основа на тие податоци треба да се креираат јавно-здравствени политики кои ќе бидат во насока на унапредување на колективниот имунитет преку процесот на имунизација на оние кои ја прележале и, пред сè, на оние кои не ја прележале болеста ковид-19.

Првата студија што ја посочува докторот е онаа на Центарот за контрола и превенција на болести од август годинава.

Согласно истражувањето спроведено во Кентаки, заклучокот е дека оние кои биле невакцинирани, а прележале ковид, имале 2.34 пати поголем ризик од реинфекција во споредба со целосно вакцинираните. Врз основа на овие податоци, препораката на ЦДЦ е целосно вакцинирање со 2 дози на оние кои прележале ковид, со што би се обезбедила дополнителна заштита од реинфекција. Втората студија се однесува на антителата. Голем број дискусии се водат околу RBD (домен врзувачки рецептор) антителата и токму оваа студија го споредува квалитетот на имунитетот на вакцинираните во однос на прележаните преку анализа на RBD антителата. Во студијата поддржана од Националните институти за здравје на САД се докажува дека имунитетот варира врз основа на тоа како се создадени антителата на поединецот против Сарс Ков 2, односно дали тие антитела се резултат на природно стекната инфекција или се стекнати по вакцинација против ковид. Доказите покажуваат дека антителата создадени како одговор на вакцината поефикасно таргетираат повеќе варијанти на Сарс Ков 2 вирусот, споредено со антителата добиени од прележување на болеста. Овие докази укажуваат дека прележаните може да имаат дополнителна корист од вакцинирањето, ни рече доктор Мехмедовиќ.

Институтот за имунологија во Скопје, пак, објави научна студија во реномирано медицинско списание со импакт фактор повисок од 10, според која и една доза од фајзеровата вакцина кај прележаните создава одличен имунитет. Втората доза на вакцината на „Фајзер“, според студијата, не додава на имунитетот ако пациентот има прележано ковид.

Нашите сознанија се во линија на тоа дека има повисоки нивоа на антитела кај прележаните после една доза и ја поддржуваат хипотезата дека една доза од вакцината на „Фајзер“ е доволна за тие што прележале ковид. Нивните антитела се повеќе отколку кај непрележаните кои примиле две дози вакцина, пишува во студијата изработена на 226 испитаници.

Во неа се додава дека во што поскоро време треба да се разработи оваа хипотеза во клиничко испитување со цел ова да им помогне на земјите што уште имаат пристап до мал број вакцини.

Новата студија која неодамна ја објави Центарот за контрола и превенција на болести на САД (август 2021 година) покажува дека имате намален ризик да се реинфицирате со ковид ако се вакцинирате.

Студијата е спроведена на лица од Кентаки, кои претходно биле инфицирани со ковид во 2020 година. Тие што биле невакцинирани имале многу поголема шанса да се реинфицираат во мај или јуни 2021 година.

Имаме податоци што покажуваат дека луѓето имаат повеќе имунитет кога ќе ја примат вакцината, отколку имунитетот што го имале кога претходно биле инфицирани, особено ако инфекцијата, односно симптомите им биле благи или средни, вели доктор Џенифер Ханрахан, раководител на одделението за инфективни болести на медицинскиот факултет при Универзитетот Толедо.

Ханрахан ги предупредува невакцинираните кои прележале ковид да престанат да сметаат дека имаат имунитет, базирано на тестовите за антитела. Таа вели дека Центарот за контрола и превенција на болести препорачува независно од тоа дали имате или немате антитела да се вакцинирате за да се заштитите себеси и другите. Притоа, потенцира дека луѓето што се пријавуваат за болничко лекување и се позитивни на вирусот се најголемиот дел невакцинирани.

За мене е навистина фрустрирачки што воопшто постојат прашања дали треба или не треба да се прими вакцина, вели таа.

Раководителката објаснува дека најновиот бран е најопасниот и лицата што се позитивни во овој бран се со генерално потешки симптоми, отколку во првите рани денови на пандемијата.

На пациентите им треба повеќе кислород и тоа е главната разлика што ја гледаме. Вакцините на „Модерна“ и „Фајзер“ се покажаа како ефикасни против повеќето варијанти на коронавирусот, вклучително и делта варијантата, за да се превенираат сериозни симптоми и да се намали ширењето на вирусот, вели докторката.

Медицинските професионалци имаат спротивставени ставови и тешко е да се донесе заклучок кој имунитет е подобар и подолгорочен, затоа што различни институции и професори тврдат различно. Она околу што најмногу се кршат копјата е времетраењето на природниот имунитет – некои сметаат дека тој трае подолго, други пократко. И последично на тоа, некои сметаат дека лицата кои прележале ковид треба да се вакцинираат побрзо, а други подоцна. Меѓутоа, здравствените политики се во насока на вакцинација за сите – и за прележаните и за непрележаните. Тешко ќе најдете медицински професионалец кој вели или студија која покажува дека оние кои прележале ковид не треба воопшто да се вакцинираат. Едноставно, вакцината се смета како уште еден слој на заштита, кој порано или подоцна треба да се аплицира, зашто избегнувањето на вакцините може да чини скапо.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар