Овие 13 деца не починале од вакцина, туку во стампедо во Кенија

Графичкото видео, кое е вознемирувачко и се злоупотребува на социјалните мрежи, нема никаква врска со вакцинацијата. Тоа е снимено во февруари 2020 година во Кенија во градот Какамеда, кога 13 деца починаа во стампедо во основно училиште, а 40 беа повредени

Рецензираме пост на Фејсбук во којшто се апелира граѓаните да не се вакцинираат и притоа се инсинуира дека таргет е прво црната раса. Во склоп на постот има објавено видео на кое се гледаат 13 починати деца, облечени во светло зелени униформи, а околу нив се наоѓаат нивните родители кои ја оплакуваат нивната смрт.

Не е вистина дека смртта на овие 13 деца има каква било врска со вакцинација!

Во февруари 2020 година, во Кенија, во градот Какамеда, 13 деца починаа во стампедо во основно училиште, а 40 беа повредени. Видеото, кое што е лажно претставено како да има некаква врска со вакцинацијата, всушност, е од овие починати деца, кои животот го загубиле во стампедо, во 17 часот по локално време кога се обидувале да го напуштат училиштето, а дел од скалите се срушиле и инцидентот заврши фатално. Во истиот инцидент 40 ученици беа повредени во основното училиште во западна Кенија.

Вакцинацијата против ковид или која било друга болест не е на ниеден начин поврзана со овие смртни случаи. Во февруари 2020 година немаше вакцина против ковид. Освен тоа, во постот малициозно се инсинуира дека убиства на вакцинираните се случуваат врз црната раса, што е небулоза и неосновано ширење страв и паника.

На ова видео се гледаат снимки од моментите кога повредените деца во истиот инцидент се пренесени во болница (од 2 минута и 55 секунда, до 3 минута и 2 секунда). Нивните светло зелени униформи се идентични со оние во видеото од постот каде се легнати починатите деца, жртви на стампедото. „Би Би Си“ има репортажа од настанот со очевидци кои раскажуваат како децата се движеле во тесен премин со скали во обид да си одат дома после часовите, почнале да паѓаат едно врз друго и така настанала трагедијата.

Истото видео од постот што го рецензираме, беше порано злоупотребувано во други лажни постови на социјалните мрежи. На пример, во еден таков пост се тврдеше дека децата починале откако некој им донел на училиште отровни слатки, што исто така е лажно тврдење.

Графичкото видео кое е вознемирувачко, предизвикува огромно внимание на социјалните мрежи па и две години подоцна со неговата злоупотреба се измамуваат граѓаните да веруваат во наративите што произведувачите на лажни информации сакаат да ги пласираат. Така, смртта на 13 деца во Кенија е злоупотребена во антивакцинална кампања за да се влијае на родителите да не ги вакцинираат децата против ковид, иако вакцината на „Фајзер“ е одобрена за таа намена и иако таа е безбедна и тестирана.

Со оглед на тоа што видеото коешто е споделено заедно со антивакцинална порака, нема никаква врска со вакцинацијата и поради тоа што може да се добие впечаток дека вакцинацијата и смртта на 13-те деца се поврзани, што не е точно. Точно е дека се случила смртта на 13 млади ученици, точно е дека на видеото се презентирани починати лица, меѓутоа не е точно дека тоа се случило поради вакцина. Вакцините не се начин за убивање на луѓето и децата, туку начин да се спасат нивните животи од опасни болести, меѓу кои и ковид. Ризиците од вакцината се многукратко помали од ризиците од ковид, како што веќе утврдија сите релевантни медицински агенции и тела во светот. Ниедна вакцина не се одобрува по субјективна волја, туку по бројни испитувања, клинички студии и осигурувања на нејзината безбедност и ефикасност.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар