(фото и видео) Акцијаши од бившите ЈУ простори го чистеа дворот на велешка Болница
Дојдоа да учествуваат на Меѓународната работна акција „Скопје на нашите дланки“ и еден ден од волонтерските активности посветија на чистење на дворот на велешка Болница. Акцијаши ветерани од бившите ЈУ простори, поточно од Јагодина и од Ниш во соседна Србија заедно со нивни колеги од Скопје, Битола и домаќините од Велес сечеа и кастреа дрвја, корнеа коров, косеа трева. Тоа денеска претпладне беа нивните бригадирски задачи на трасата во Велес.
Зборувајќи со акцијашки речник ќе додадеме дека 23 ветерани дадоа придонес во разубавување на дворот на нашата градска болница без за тоа да бидат платени. Така функционира акцијаштвото и особено е значајно да се помогне на членовите на акцијашко здружение на граѓани во било кој град на Македонија, во Србија, во Словенија, во Босна и Херцеговина или во други држави од поранешна Југолславија, рече Делчо Костов претседател на ЗГ „Велешки акцијаши“.
Акцијашите ветерани Сибин Стефановиќ од Ниш и Дејан Крстиќ од Јагодина за прв пат беа учесници на акција и го видоа Велес. Ударнички работеа иако се во поодминати години. Крстиќ ги пренесе своите впечатоци за денешната акција во дворот на велешка Болница, додека Стефановиќ ни соопшти дека ќе учествуваат на уште една во Македонија.
Денешната акција за чистење од диви растенија, коров и трева на болничкиот двор во Велес е само една активност од повеќето кои се реализираат во рамките на Меѓународната работна акција „Скопје на нашите дланки“. Околу 150 акцијаши ветерани од бившите ЈУ Републики заедно со колегите од Македонија, седум дена го разубавуваат главниот град на нашата држава. Нивниот волонтерски придонес е посветен на одбележувањето на јубилејот 60 години од катастрофалниот земјотрес во Скопје чие главно мото е „Никогаш да не се повтори“.
Стефани Манева