Општина Велес: Каснувањето од бездомно куче станува предмет на истрага на Основно јавно обвинителство Велес

Општина Велес соопшти дека поради зголемениот број на каснати граѓани од бездомни кучиња кои бараат оштета од локалната самоуправа се отвара предмет на истрага во Основно јавно обвинителство Велес. Од локалната самоуправа објаснуваат дека е зголемен бројот на постапки кои ги води општината по иницијатива на граѓани каснати од бездомни кучиња.

-За дел од нив постои сомнеж дека зад овие немили настани стои добро организирана група на луѓе која на нелегален начин се обидува да се стекне со парични средства и на тој начин да го оштети буџетот на Општина Велес. Општина Велес има сознанија дека организираната група се состои од доктори, медицински персонал, вештаци, претставници на Министерството за внатрешни работи, адвокати кои се вклучени во постапката за лесна заработувачка преку исценирани каснувања од кучиња скитници, пишува во соопштението на Општина Велес.

Оттаму велат дека бројни примери потврдуваат дека дел од граѓаните ја злоупотребуваат состојбата со цел да се стекнат со финансиски средства и додаваат дека за жал го прават тоа на мошне бизарен начин.

-Нивната бесмисленост оди дотаму што пријавуваат напад од улично куче и кога ќе ги касне нивното домашно милениче. Граѓани со гребаница пријавуваат напад од куче без да постои доказ од што е настаната и започнуваат постапка за обештетување од Општина Велес. При самиот преглед на раната, на овие граѓани им се укажувало како да се произнесат во извештајот, кој адвокат да ги застапува и кое вешто лице да изврши вешт наод. Во консултации со медицински експерти и правни експерти од медицинска област е укажано дека зачудува дел од содржината на доказите кои „оштетените“ граѓани ја употребуваат за да бараат штета. Така, во медицинските извештаи во делот анамнеза зачудува како може медицинските лица да констатираат дека се работи за рана или повреда од улично куче, па мислењето е дека без прецизно да биде утврдено тоа, медицинските лица во делот анамнеза можат само да наведат дека по кажување на граѓанин истиот е каснат или не од улично куче, а не дека тоа е утврдено од нивна страна, пишува во соопштението на Општина Велес.

Од локалната самоуправа велат дека секоја пријава за напад и каснување од бездомно куче треба да се испита од страна на стручни лица, да се изврши фотографирање на раната од страна на специјализирани служби на МВР – СВР Велес и да се даде детален опис на истата.

-Да се бара податок за приближно точно време на каснувањето и точна локација на настанот за да може да се изврши проверка преку видео снимки од околните објекти или од лица што се затекнале на местото на настанот. За надминување и искоренување на ваквата појава неопходна е системска и институционална соработка (Општина Велес, МВР-СВР Велес, Општа болница Велес, Брза помош Велес и Јавно обвинителство Велес), стои во соопштението на локалната самоуправа.

Од Општина Велес додаваат дека ќе се употребат сите правни механизми за да ја испитаат негативната појава која се повторува и зголемува од година во година и доколку се утврди дека е вистина ќе ги преземат сите законски мерки против учесниците во организираната група.

Стефани Манева