РЦУК Велес: Активни пожари во Чашка, Росоман, Градско и Неготино, на дел од пожарите се гасне и од воздух

Регионалниот центар за управување со кризи Велес инфромира дека се активни четири пожари поточно во општина Чашка, Градско, Росоман и Неготино.

Во Општина Чашка има шумски пожар на планината Голешница на Врвот Лисец помеѓу селата Горно Јаболчиште и Дреново којшто беше локализиран и од вчера е повторно активен. Пожарот е на многу висок и непристапен терен кадешто не може да дејствуваат од земја поради висока и густа вегетација.

-Пожарот што во текот на вчерашниот ден префрли од село Слепче во Општина Прилеп кон село Габровник во Општина Чашка на планината Бабуна. Според информацијта добиена од ЈП Национални шуми „Бабуна“ од Велес пожарот од страната на село Габровник е ставен под контрола, интервенираа 6 варботени од подружницата, додека од страна на село Мокрени, место викано „Мокренски Јазик“, пожарот е активен, а истиот е приземен пожар при што горат паднатите лисја, информираат од РЦУК Велес.

Во атарот на село Сирково во Општина Росоман, вчера, во 12:20 часот започнал пожар на отворен простор на тешко пристапен терен и се ширел во повеќе правци од коишто еден праец кон село Подлес во Општина Градско. Таму гори ниска вегетација, сува трева и нискостевлеста шума и зафатена е голема површина.

-Во текот на денот интервенирале: ТППЕ Кавадарци со 7 пожарникари и 3 ПП Возила, ТППЕ Велес со 5 пожарникари и 1 ПП возило, 3 цистерни и 1 булдожер од ЈП „Комуналец“ Кавадарци, месно население и механизација од месното население. На пожарот во неколку налети дејствуваа и двата ер-трактори на Република Турција и еден канадер на Република Хрватска, додаваат од ЦУК.

Во Општина Неготино активни се пожари над воениот АБХ полигон во правец на „Штипско рамниште“ на планината Серта во места викани „Бин Курија“, „Врчидол“, „Вршникот“ и во атарот на село Калањево на место викано Дуњица на непристапен терен и Длабоки дол каде според информациите од терен добиени од ЦУК состојбата и на двата активни пожари е алармантна.

-Гори нискостеблеста шума, сува трева и грмушки. Ангажирани локални ресурси од страна на Кризниот штаб Неготино се: -ТППЕ Неготино 10 пожарникари со 2 цистерни и 1 џип -ЈП Комуналец Неготино 7 вработени со 2 цистерни -Ловно друштво Вардар Неготино со 10 лица ЈП Комуналец Кавадарци 3 вработени со 2 цистерни -ЈП Македонија пат со 15 вработени, 1 грејдер, 1 скип, 10 моторни пили и 1 гасеничар -приватен сектор со 2 трактор цистерни -Полициска станица Неготино 10 вработени со 1 дрон -Национални шуми Демир Капија 10 вработени,1 џип и 1 цистерна Силите се распоредени на двата пожари, објаснуваат од ЦУК.

Во гаснењето кај Калањево бил вклучен еден хеликоптер. На пожарот над воениот АБХ полигон на планината Серта од географската страна на Општина Неготино, немало гаснење од воздух.

Стефани Манева