Семинар за напредно уредување на Википедија за Вики Сениор членовите на Вики Клуб Велес (фото)

Во медиотеката на градската библиотека „ Гоце Делчев“ денеска се одржа семинар за напредно уредување на Википедија на македонски јазик. Повеќето од присутните членови на Вики Сениор Велес имаат претходно посетено обуки и имаат дадено свој значен допринос во збогатување на содржини на Википедија на македонски јазик. Овој семинар беше чекор напред во проширување на нивните знаења во уредувањето на статиите на Википедија.

„Новите уредувачи се просперитетни придонесувачи и корисници, а со тоа, тие се и најзначаен извор на Википедија. Не е можно почетник википедијанец да биде целосно запознаен со правилата на Википедија, нејзините начела, принципи и стандарди. Затоа со семинари и обуки се трудиме да се прошират знаењата за уредување на статии на Википедија на македонски јазик, рече Лили Арсова.

Извршниот директор на Здружението на Викимедија МКД Снежана Штрковска одржа предавање со примери на темите: Што е и што не е Википедија, значајност (луѓе, музика, книги, фирми, спорт, настани…)  правило за корисничко име и корисничка страница и што претставува добро напишана и уредена статија.

Лили Арсова зборуваше на темите: Етика на Википедија, ве молиме не ги напаѓајте новодојденците, без правни закани и автобиографија.

Боса Филиповиќ зборуваше на темите: Најчести грешки при уредувањето, совети и трикови и што значат информации на Википедија од неутрална гледна точка.

Јован Тасевски го објаснуваше значењето и начинот на уредување како извори, наводи, цитати, внатрешни врски и како истите се ставаат во статија.

Бојан Велковски го објаснуваше начинот за поставување и подигање на фотографии на комонс и како потоа тие се ставаат во статија.

Убавка Јаневска