СВР Велес: Едукативна работилница за учениците од економското училиште, колку е штетно користењето на пиротехничките средства
Во пресрет на Новогодишните и Божиќните празници, со учениците од средното стручно општинско училиште „Јовче Тесличков“ во Велес, вчера, полициски службеници од Отсек за превенција при Сектор за внатрешни работи Велес заедно со полициски службеници од Одделение за општ криминал организираа едукативна работилница на тема „Не за користење на пиротехнички средства и петарди“, ,,Слави со срце, не со оружје“ и „Волан и алкохол најлоша комбинација“.
-На едукативната работилница на учениците преку едукативна презентација им беа претставени штетните последици од користењето на пиротехнички средства и им беше укажувано за опасностите по здравјето, безбедноста и законските последици од недозволеното користење на пиротехнички средства, како и последиците до кои може да дојде доколку се управува возило под дејство на алкохол, соопштуваат од Министерство за внатрешни работи.
Во текот на истиот ден и полициски службеници од ОВР Свети Николе спроведоа едукативна активност со учениците од средното општинско училиште „Кочо Рацин“ на истата тема.
-Преку наменски подготвена презентација, полициските службеници ги запознаа учениците со опасностите и последиците од незаконската употреба на петарди и други пиротехнички средства. Воедно им беше укажано дека сите пиротехнички средства се опасни бидејќи содржат експлозив и можат да предизвикаат тешки и трајни последици, додаваат од МВР.
Учениците беа запознаени и со законските санкции кои се предвидени за употреба, набавка и продажба на пиротехнички средства.
Стефани Манева