Во наредните два до три часа ќе се зголемува протокот на вода во Вардар кај Велес

Две поплавени куќи во кои никој не живее, лоцирани до речното корито кај местото викано Бентот и неколку градини со ран зеленчук под вода, ова е епилогот од вчерашните поројни дождови во Велес. Интензивните врнежи на дожд предизвикаа повторно излевање на водата од река Вардар кај Башино село и ги поплави двете куќи над Башиноселскиот мост.

Од Центарот за управување со кризи информираат дека вчерашното невреме проследено со силен дожд направило проблеми и во село Иванковци каде жителите имале проблем со оштетување на водоводната мрежа поради големите наноси од вода и песок. Во наредните три до четири часа се очекува водостојот на Вардар да се зголемува, велат од подрачното одделение во Велес на Дирекцијата за заштита и спасување, но исто така дека нема опасности од ново излевање на реката.

Инаку утрово протокот на водата во Вардар изнесувала 194 метри кубни во секунда што е за 59 метри кубни повеќе од вчерашниот.

Невремето вчера направи проблем и кај Потокот, од кој водата се прелеа на улицата, но не им направи штети на жителите кои претходно биле предупредени. Денеска тој е во стабилна состојба.